नाशिक : बागलाण तालुक्यातील भाक्षी येथील जवान स्वप्निल रौंदळ यांचा उधमपूर येथे प्रशिक्षणादरम्यान मृत्यू झाला. खंदकात आग लागून ही दुर्दैवी घटना घडली. जवान शहीद झाल्याने गावात एकाही घरावर गुढी उभारली गेली नाही. स्वप्निल रौंदळ हे २०१६ मध्ये प्रशिक्षण पूर्ण करून सैन्यात दाखल झाले होते. पहिली नियुक्ती राजस्थानात मिळाली. नुकतीच त्यांची उधमपूर येथे नेमणूक झाली होती. याठिकाणी त्यांचे सेवाअंतर्गत प्रशिक्षण सुरू होते. या प्रशिक्षणादरम्यान मंगळवारी पहाटे खंदकात आग लागली. या आगीत चार जवान होरपळून गंभीर जखमी झाले. स्वप्निल ९० टक्के भाजल्याने त्यांचा जागीच मृत्यू झाल्याचे सूत्रांनी सांगितले. स्वप्निल यांच्या पश्चात आई, वडील, भाऊ आणि बहीण असा परिवार आहे.
