राज्यात सध्या शिवसेना, राष्ट्रवादी आणि काँग्रेस एकत्र येऊन सत्ता स्थापन करण्याचे सकारात्मक संकेत दिले आहेत. राज्यात सत्तेचं नवं समीकरण जुळून येत असताना, नाशिकमध्ये भाजपा आणि मनसे एकत्र आले आहेत. नाशिकमधील महापौर निवडणुकीत मनसेने दिलेल्या पाठिंब्यामुळे महापौरपदाची माळ भाजपाच्या गळ्यात पडली आहे. भाजपाचे सतीश कुलकर्णी यांची बिनविरोध नाशिक महापौरपदी निवड झाली आहे.तर उपमहापौरपदी भिकुबाई बागल यांची बिनविरोध निवड झाली आहे. महत्त्वाचं म्हणजे शिवसेना, राष्ट्रवादी आणि काँग्रेस यांची महाविकास आघाडी एकत्र येऊनही विजय मिळवू शकले नाहीत. शिवसेनेने भाजपाचे १० नगरसेवक फोडले असल्या कारणाने शिवसेनेचा विजय नक्की मानला जात होता. पण मनसेने भाजपाला साथ दिल्याने तसंच काँग्रेसचे नगरसेवक गळाला लागल्याने भाजपाचा विजय झाला आहे. भाजपाचे बंडखोर नगरसेवकदेखील पुन्हा परत आल्याने भाजपाचा विजयाचा मार्ग सुकर झाला. मनसेने बजावला होता व्हीप मनसेने आपल्या पाचही नगरसेवकांना व्हीप बजावत महापौर निवडणुकीत भाजपा उमेदवाराला मतदान करण्याचा आदेश दिला होता. आदेशाचं पालन न केल्यास कारवाई करण्यात येईल असंही व्हीपमध्ये सांगण्यात आलं होतं.