बर्ड फ्लूचं सावट: नवापुरात कोंबड्या नष्ट; नाशिकमध्ये सतर्कतेचा इशारा

बर्ड फ्लू हा आजार कुक्कुट पक्ष्यांमध्ये वेगाने पसरतो. त्याचा परिणाम मोठ्या प्रमाणात होऊ शकतो. त्यामुळे कुक्कुटपालन केंद्रांवर कोणतीही लक्षणे दिसल्यास ती तत्काळ गांभीर्याने घेणे आवश्यक आहे. पक्ष्यांमध्ये अचानक मृत्यूचे प्रमाण वाढणे, खाद्य व पाण्याचे सेवन कमी होणे, सुस्ती किंवा अशक्तपणा, अंडी उत्पादनात अचानक घट, श्वसनास त्रास किंवा नाकातून स्त्राव येणे, ही लक्षणे आढळल्यास त्वरित संबंधित यंत्रणेला कळवावे.

कुक्कुट पालकांनी अशी कोणतीही संशयास्पद बाब आढळल्यास नाशिक येथील जिल्हा पशुसंवर्धन कार्यालय किंवा नजीकच्या शासकीय पशुवैद्यकीय दवाखान्यास तसेच संबंधित पंचायत समिती कार्यालयाशी त्वरित संपर्क साधावा. माहिती प्राप्त होताच पशुसंवर्धन विभागामार्फत तज्ज्ञ पथक पाठवून नमुने संकलित करण्यात येतील व शासनाच्या मार्गदर्शक सूचनांनुसार आवश्यक प्रतिबंधात्मक उपाययोजना राबविण्यात येतील, असे प्रशासनाने म्हटले आहे.

नाशिक जिल्ह्यात पोल्ट्री उद्योग मोठ्या प्रमाणात आहे. बर्ड फ्लूच्या संकटामुळे काही वर्षांपूर्वी पोल्ट्री व्यावसायिकांना मोठे नुकसान सहन करावे लागले होते. नंदुरबार जिल्ह्यात काही पोल्ट्री फार्ममधील नमुने पॉझिटिव्ह आल्यानंतर संबंधित परिसरातील एक लाख ४० हजार कोंबड्या शास्त्रीय पद्धतीने नष्ट करण्याची कार्यवाही सुरू केली जात आहे.

पोल्ट्री व्यावसायिकांना आवाहन

बाहेरील व्यक्तींचा पोल्ट्री फार्ममध्ये प्रवेश मर्यादित ठेवावा. फार्म परिसराचे नियमित निर्जंतुकीकरण करावे. मृत पक्ष्यांची विल्हेवाट शास्त्रोक्त पद्धतीने लावावी. नवीन पक्षी आणताना त्यांना स्वतंत्र विलगीकरणात ठेवावे. स्वच्छता व जैवसुरक्षा नियमांचे काटेकोर पालन करावे. अफवा किंवा अप्रमाणित माहितीवर विश्वास न ठेवता कोणतीही संशयास्पद घटना तत्काळ प्रशासनाच्या निदर्शनास आणावी, असेही जिल्हा पशुसंवर्धन उपायुक्त डॉ. धर्माधिकारी यांनी कळविले आहे.