Bhujbal On Pawar Meet : पवार-पवार भेटीचं ‘ते’ गुपित अखेर समोर; छगन भुजबळांनी सांगितलं त्या बैठकीत नेमकं काय घडलं!

दिवंगत उपमुख्यमंत्री अजित पवार यांच्या अस्थींचे सोमवारी रामकुंडात विसर्जन करण्यात आले. यावेळी मंत्री छगन भुजबळ व नरहरी झिरवाळ यांच्यासह पंकज भुजबळ, माणिकराव कोकाटे, दिलीप बनकर, हिरामण खोसकर, सरोज आहिरे हे आमदार, पक्षाचे नेते, पदाधिकारी व कार्यकर्ते उपस्थित होते. मंत्री भुजबळ यांनी माध्यमांशी संवाद साधताना दोन्ही राष्ट्रवादीच्या विलीनीकरणाबाबत काही चर्चा झाल्याची माहिती नसल्याचे नमूद केले. आता उपमुख्यमंत्री सुनेत्रा पवार या आमच्या नेत्या असून पक्षाच्या भविष्याबाबत त्या योग्य निर्णय घेतील. विलीनीकरणाचा निर्णय एकत्रितपणे घ्यावा लागेल. आम्ही भाजपबरोबर सरकारमध्ये असून अशा निर्णयास त्यांचाही पाठिंबा आवश्यक असेल. आपण सरकारमधून बाहेर पडत असू तर ती वेगळी गोष्ट आहे. अजितदादांनी एनडीएपासून दूर जाण्याचा विचार केला नव्हता, असे आमचे सर्वांचे मत असल्याचे भुजबळ यांनी सांगितले.

अजितदादांनी बारामतीमध्ये चांगले काम केलेल्या खा. सुनेत्रा पवार यांच्याशी अनेक गोष्टींवर चर्चा केली असेल. अजितदादांची दूरदृष्टी आणि पक्षाचे भविष्य जाणून घेण्यासाठी त्या सर्वात योग्य व्यक्ती आहेत. त्या जो काही निर्णय घेतील, त्याचे पक्ष पालन करेल असेही त्यांनी सांगितले.

राष्ट्रवादी शरद पवार गटाचे प्रमुख शरद पवार आणि राष्ट्रवादी अजित पवार गटाचे अध्यक्ष अजित पवार यांच्यात शरद पवार गटाच्या पदाधिकाऱ्यांच्या उपस्थितीत झालेल्या चर्चेच्या चित्रफितीबाबत भुजबळ यांनी ही सर्व मंडळी कृषी प्रदर्शनाच्या नियोजनासाठी बैठकीत जमले होते. बारामतीचा हा विषय असल्याने तिथे अजितदादा एकटेच होते. विलीनीकरणाची चर्चा करायची असती तर आमचे काही सहकारी तिथे उपस्थित राहिले असते, असा दावा भुजबळ यांनी केला. या काळात माध्यमांनी उपमुख्यमंत्रीपदासाठी आपले नांव घ्यायला सुरुवात केली होती. आपण ही अटकळ तात्काळ फेटाळून लावत असे काहीही नसल्याचे स्पष्ट केले. हे पक्षांतर्गत भांडण लावण्याचा एक भाग असल्याचेही ते म्हणाले.