Dhule Corporation Election : धुळे हादरले : निवडणूक माघारीदरम्यान तणाव; गोळीबार आणि कोयत्याने हल्ला

पहिल्या घटनेत, निवडणूक फॉर्म माघारीच्या कार्यालयाबाहेर झालेल्या शाब्दिक वादाचे रूपांतर थेट हिंसाचारात झाले. या प्रकरणी गौरव रमेश नरोटे (वय ३२, रिक्षाचालक, रा. नेहरू नगर, मास्तरवाडी, देवपूर) यांनी देवपूर पोलिस ठाण्यात फिर्याद दिली आहे. फिर्यादीच्या तक्रारीनुसार दि. दोन जानेवारी २०२६ रोजी दुपारी सुमारे तीन वाजता देवपूर भागातील सागर टी हाऊसजवळ निवडणूक फॉर्म माघारी घेण्याच्या कार्यालयाबाहेर आरोपी व तक्रारदार यांच्यात वाद झाला.

थेट गोळीबार?

या वादानंतर आरोपींनी गैरकायद्याची मंडळी जमा करून जीवे ठार मारण्याच्या उद्देशाने गावठी कट्ट्याने गोळीबार केला. तसेच साक्षीदारांवर लोखंडी रॉडने मारहाण करण्यात आली. या वेळी जातिवाचक शिवीगाळ करत जीवे मारण्याची धमकी देण्यात आल्याचाही आरोप आहे. या घटनेत उमेश कांबळे हे जखमी झाले असून त्यांच्यावर देवपूर येथील सिद्धेश्वर हॉस्पिटलमध्ये उपचार सुरू आहेत. या प्रकरणी देवपूर पोलिस ठाण्यात शस्त्र अधिनियम कलम ३/२५ तसेच अनुसूचित जाती-जमाती अत्याचार प्रतिबंधक कायद्यान्वये गंभीर स्वरूपाचा गुन्हा दाखल करण्यात आला आहे. या गुन्ह्यात पप्पू ऊर्फ गौरव बोरसे, राजेंद्र महादू बोरसे, गिरीष ऊर्फ बबलू चौधरी, रमेश बोरसे, भावराज बोरसे, यश बोरसे आणि परेश बोरसे (सर्व रा. देवपूर, ता. जि. धुळे) यांचा समावेश आहे.

दरम्यान, याच दिवशी देवपूर भागात दुसरी एक हिंसक घटना घडली. या प्रकरणी यश प्रकाश बोरसे (वय २६, व्यवसाय लँड डेव्हलपर्स, रा. उत्तरमुखी मारोती मंदिर मार्ग, बाडी भोकर रोड, देवपूर) यांनी देवपूर पोलिस ठाण्यात तक्रार दाखल केली आहे. तक्रारीनुसार दि. २ जानेवारी २०२६ रोजी दुपारी साडे बारा वाजता नेहरू नगर येथील पाण्याच्या टाकीजवळ तक्रारदाराकडे महापालिकेच्या उमेदवार शुभांगी जाधव यांच्याबाबत विचारणा करण्यात आली.“त्या कुठे आहेत, याची मला माहिती नाही,” असे उत्तर दिल्याचा राग मनात धरून आरोपींनी रस्ता अडवून कोयत्याने चाक दाखवत हल्ला केला. या हल्ल्यात रमेश महादू बोरसे (तक्रारदारांचे काका) हे जखमी झाले असून त्यांच्या तोंडावर गंभीर वार करण्यात आला.

जखमींना तत्काळ सिव्हिल हॉस्पिटल, धुळे येथे दाखल करण्यात आले आहे. या दुसऱ्या घटनेप्रकरणी देवपूर पोलिस ठाण्यात गुन्हा क्रमांक ०४/२०२६ नुसार भारतीय न्याय संहिता २०२३ मधील विविध कलमांसह शस्त्र अधिनियम कलम ४/२५ अंतर्गत गुन्हा दाखल करण्यात आला आहे. आरोपींमध्ये सागर कांबळे, गौरव नरोटे, उमेश ऊर्फ बंटी कांबळे, लखन लोणारी आणि अजय कांबळे (सर्व रा. देवपूर, ता. जि. धुळे) यांचा समावेश आहे.

पोलीसांना अधिक सतर्क राहण्याची गरज

दोन्ही घटनांची माहिती जिल्हा नियंत्रण कक्षास देण्यात आली असून अपर पोलीस अधीक्षक अजय देवरे आणि उपविभागीय पोलीस अधिकारी राजकुमार उपासे यांनी घटनास्थळी भेट देऊन पाहणी केली आहे. सध्या दोन्ही गुन्ह्यांतील आरोपींचा शोध घेऊन अटकेची कारवाई सुरू असून देवपूर परिसरात अतिरिक्त पोलिस बंदोबस्त तैनात करण्यात आला आहे. सध्या परिस्थिती नियंत्रणात असून परिसरात शांतता असल्याचे पोलिसांकडून सांगण्यात आले आहे. या सलग घडलेल्या हिंसक घटनांमुळे निवडणूक प्रक्रियेच्या पारदर्शकतेवर आणि सुरक्षिततेवर प्रश्नचिन्ह निर्माण झाले आहे.

निवडणूक काळात कायदा- सुव्यवस्था

अबाधित राखणे ही प्रशासनाची मोठी जबाबदारी असून, अशा प्रकारांमुळे नागरिकांमध्ये भीतीचे वातावरण पसरत आहे. त्यामुळे आगामी काळात संवेदनशील भागांमध्ये पोलिसांचा कडेकोट बंदोबस्त ठेवण्यात यावा, तसेच दोषींवर कठोर कारवाई करून अशा घटनांना आळा घालावा, अशी मागणी सुज्ञ नागरिकांकडून केली जात आहे.