New Railway Project: धुळे : नवीन मनमाड–इंदूर रेल्वे मार्ग जमीन अधिग्रहण प्रक्रियेत अनिल गोटे यांची उडी…

मनमाड–इंदूर रेल्वे मार्गाच्या भूसंपादन प्रक्रियेला सुरुवात झाल्यानंतर आयोजित पत्रकार परिषदेत गोटे यांनी जमीनमालक व शेतकऱ्यांच्या बाजूने भूमिका मांडली. जिल्हाधिकारी श्रीमती भाग्यश्री विसपुते तसेच महसूल विभागातील अधिकारी पोलिस बंदोबस्तासह संबंधित ठिकाणी जमिनींचे संपादन करण्यासाठी पोहोचल्याचे त्यांनी सांगितले.

रेल्वे मार्गासाठी शेतकऱ्यांना जाहीर केलेला चार लाख रुपये प्रति एकर दर हा अन्यायकारक असून तो “भिकेचा तुकडा” असल्यासारखा आहे, अशी टीका गोटे यांनी केली. “चार लाख रुपयांत जुने वाहनही मिळत नाही. शेती हा तोट्याचा व्यवसाय असतानाही पिढ्यान्‌पिढ्या शेतीवर अवलंबून असलेल्या शेतकऱ्यांवर जमीन अधिग्रहणाचे नवे संकट कोसळले आहे. ‘आई जेवू घालीना आणि बाप भिक मागू देईना’ अशी त्यांची अवस्था झाली आहे,” असे ते म्हणाले. सरकार शेतमालाला योग्य भाव देत नाही. परदेशातून कापूस, मूग यांसारख्या शेतीमालाची आयात करून देशांतर्गत बाजारभाव पाडले जात आहेत, असा आरोपही त्यांनी केला.

विकासासाठी जमिनीची गरज असल्याबाबत आमचे दुमत नाही; मात्र राष्ट्रीय महामार्गासाठी जो दर दिला जातो तोच दर रेल्वे प्रकल्पासाठी का दिला जात नाही, असा सवाल गोटे यांनी उपस्थित केला. “महामार्गाच्या कामांमुळे ठेकेदार अब्जाधीश झाले, महामार्गांची दरवर्षी दुरुस्ती करावी लागते; परंतु शंभर वर्षे टिकणाऱ्या रेल्वे मार्गासाठी तेवढी दुरुस्ती लागत नाही. ही वस्तुस्थिती लक्षात घेतली पाहिजे,” असे ते म्हणाले. मनमाड–इंदूर रेल्वे मार्गाचा प्रश्न आपण तत्कालीन रेल्वेमंत्री ममता बॅनर्जी आणि माजी पंतप्रधान अटल बिहारी वाजपेयी यांच्यापर्यंत पोहोचवला होता. त्या वेळी अधिग्रहित जमिनीच्या बदल्यात संबंधित शेतकरी कुटुंबातील एका व्यक्तीस रेल्वे सेवेत सामावून घेण्याचे आश्वासन देण्यात आले होते, असा दावा त्यांनी केला. “त्या वेळीही भाजपचे सरकार होते आणि आताही भाजपचेच सरकार आहे. पक्षाच्या पंतप्रधानांनी दिलेले आश्वासन पाळले जाणार नाही काय?” असा प्रश्न त्यांनी उपस्थित केला.

राष्ट्रीय महामार्गासाठी लागू असलेला दर मनमाड–इंदूर रेल्वे मार्गालाही लागू करावा, तसेच शेतकऱ्यांच्या उपजीविकेचे साधन असलेली जमीन देताना त्यांच्या कुटुंबातील एका सदस्यास शैक्षणिक पात्रतेनुसार रेल्वेच्या शासकीय सेवेत संधी द्यावी, अशी मागणी गोटे यांनी पुन्हा एकदा केली.