धुळे : खोटी (असत्य) प्रतिज्ञापत्रे दाखल करणाऱ्यांवर कायदेशीर चौकशी करून दोषी आढळल्यास कठोर कारवाई करण्यात यावी, अशी मागणी संदीप प्रेमसिंग जमादार यांनी जिल्हा प्रशासनाकडे वारंवार केली होती. मात्र या मागण्यांकडे सातत्याने दुर्लक्ष होत असल्याचा आरोप करत आज जमादार यांनी आत्मदहन करण्याचा प्रयत्न केल्याची घटना घडली. प्रसंगावधान राखत पोलिसांनी तात्काळ हस्तक्षेप करून त्यांना ताब्यात घेतले. या घटनेमुळे परिसरात खळबळ उडाली.
या संदर्भात जमादार यांनी दिलेल्या प्रसिद्धीपत्रकात म्हटले आहे की, संबंधित मुद्रांक प्रतिज्ञापत्रामधील मजकुरात स्पष्टपणे व्याजाचा तसेच शेकडा पाच टक्के रकमेचा उल्लेख असतानाही तत्कालीन नायब तहसीलदार, शिरपूर यांनी कोणत्या कायद्याच्या आधारे त्या प्रतिज्ञापत्रावर सही व शासकीय शिक्का केला, याची सखोल आणि कायदेशीर चौकशी करण्यात यावी. तसेच या प्रकरणात तत्कालीन नायब तहसीलदारांवर कायदेशीर कारवाई का करण्यात येऊ नये, असा सवालही त्यांनी उपस्थित केला आहे.
याशिवाय, सदर मुद्रांक प्रतिज्ञापत्रावर तहसील कार्यालय, शिरपूर येथे रजिस्टर नोंद क्रमांक कोणत्या आधारावर देण्यात आला, याचीही चौकशी होणे आवश्यक असल्याचे त्यांनी नमूद केले आहे. संबंधित प्रकरणात विद्यमान तहसीलदार, शिरपूर यांनी वारंवार पोलीस निरीक्षक, शिरपूर यांना तीन ते चार पत्रे पाठवूनही अद्याप ठोस चौकशी सुरू न केल्याचा आरोप जमादार यांनी केला आहे. प्रसिद्धीपत्रकात पुढे म्हटले आहे की, मुद्रांक नोंदणी पत्र विकणाऱ्याने मागील तारखेचा मुद्रांक व नोंदणी क्रमांक देऊन संबंधित व्यक्तींना सहकार्य केल्याचे निदर्शनास येत आहे. त्यामुळे अशा मुद्रांक विक्रेत्यांवरही कायदेशीर चौकशी करून दोषी आढळल्यास कठोर कारवाई करण्यात यावी, अशी मागणी त्यांनी केली आहे.
या सर्व बाबींवर जिल्हा प्रशासनाने अद्याप ठोस भूमिका न घेतल्याने मानसिक त्रास सहन करावा लागत असल्याचे सांगत जमादार यांनी टोकाचे पाऊल उचलल्याचा आरोप केला आहे. दरम्यान, आत्मदहनाच्या प्रयत्नानंतर पोलिसांनी त्यांना सुरक्षित ताब्यात घेतले असून पुढील चौकशी सुरू आहे. या घटनेमुळे महसूल विभागातील कामकाजाच्या पारदर्शकतेबाबत आणि मुद्रांक प्रतिज्ञापत्रांच्या प्रक्रियेबाबत पुन्हा एकदा प्रश्नचिन्ह उपस्थित झाले आहे.
दरम्यान, या घटनेनंतर संबंधित विभागातील वरिष्ठ अधिकाऱ्यांनी परिस्थितीची माहिती घेतली असून प्रकरणाच्या गांभीर्याची दखल घेण्यात येत असल्याचे सांगितले जात आहे. जिल्हा प्रशासनाकडून या आरोपांबाबत प्राथमिक चौकशी सुरू करण्याची शक्यता असून, आवश्यक असल्यास स्वतंत्र चौकशी समिती नेमली जाऊ शकते, असे संकेतही देण्यात आले आहेत. संबंधित कागदपत्रांची तपासणी करून दोषी व्यक्तींवर कारवाई करण्यात येऊ शकेल.
दरम्यान, आत्मदहनाचा प्रयत्न ही अत्यंत गंभीर बाब असून अशा प्रकारे आंदोलन करण्याऐवजी कायदेशीर मार्ग अवलंबावा, असे आवाहन प्रशासन व पोलिसांकडून करण्यात आले आहे. या प्रकरणाचा पुढील तपास सुरू असून, प्रशासनाच्या भूमिकेकडे आता सर्वांचे लक्ष लागले आहे.
मंत्री गिरीश महाजन यांचा निषेध
नाशिक येथे प्रजासत्ताक दिनानिमित्त झालेल्या कार्यक्रमात गिरीश महाजन यांनी डॉ. बाबासाहेब आंबेडकर यांचे नाव न घेतल्याने एका महिलेने नाराजी व्यक्त केली. या घटनेचा निषेध म्हणून धुळे येथील आंबेडकर अनुयायांनी तीव्र प्रतिक्रिया व्यक्त केली. यावेळी अनुयायांनी गिरीश महाजन यांच्या पुतळ्याला जोडे मारून तो जाळत निषेध नोंदवला.
डॉ. बाबासाहेब आंबेडकर यांनी भारताला संविधान दिले असून, अशा महापुरुषांचे नाव जाणूनबुजून न घेतल्याचा आरोप यावेळी आंदोलकांनी केला. या प्रकारामुळे परिसरात तणावाचे वातावरण निर्माण झाले होते.
