धुळे : एकीकडे संपूर्ण महाराष्ट्रभरात दुष्काळाचे सावट असतानाही गणरायाच्या आगमनाचा उत्साह शिगेला पोहोचला आहे. अशातच खान्देशातील धुळे शहरातून धार्मिक ऐक्य, सामाजिक सलोखा आणि सर्वधर्मसमभावाची एक अतिशय सुरेख अन् कुतूहल निर्माण करणारी बातमी समोर आली आहे. गणेश चतुर्थीचे औचित्य साधून शिवसेना (उद्धव बाळासाहेब ठाकरे) पक्षाच्या धुळे शहरातील मध्यवर्ती कार्यालयात यंदा एका मुस्लिम कट्टर शिवसैनिकाच्या हस्ते श्रींची विधिवत स्थापना करण्यात आली. या उपक्रमाने संपूर्ण शहराचे लक्ष वेधून घेतले आहे.
धुळे येथील प्रबोधनकार ठाकरे संकुलस्थित शिवसेना मध्यवर्ती कार्यालयात दरवर्षी विविध मान्यवरांच्या हस्ते बाप्पाची स्थापना केली जाते. मात्र, यंदा या स्थापनेचा बहुमान पक्षाचे शहर सहसंघटक आणि कट्टर शिवसैनिक मुन्ना पठाण यांना देण्यात आला. मुन्ना पठाण यांनी आपल्या हातांनी श्री गणेशाची मूर्ती स्थापन करून आरती केली, तेव्हा उपस्थितांचे डोळे अभिमानाने आणि भक्तिभावाने भरून आले. एका मुस्लिम पदाधिकाऱ्याने हिंदू धर्मातील अत्यंत पवित्र मानल्या जाणाऱ्या सणात आघाडी घेऊन बाप्पाची स्थापना करावी, ही घटना धुळ्यातील सामाजिक एकात्मतेची वीण किती घट्ट आहे, हेच सिद्ध करते.
कोण हे मुन्ना पठाण
मुन्ना पठाण हे गेल्या अनेक वर्षांपासून पक्षात सक्रिय असून त्यांनी यापूर्वी उपमहानगरप्रमुख म्हणूनही जबाबदारी सांभाळली आहे. सामाजिक जीवनात त्यांचा हिंदू बांधवांशी अत्यंत जिव्हाळ्याचा संबंध राहिलेला आहे. शहरात होणाऱ्या प्रत्येक हिंदू सण-उत्सवात ते नेहमीच हिरीरीने सहभागी होतात. यापूर्वी ‘भाग्या मारुती विजय व्यायाम शाळा गणेश मंडळ’मध्येही त्यांनी अनेक वर्षे सक्रिय योगदान दिले आहे. त्यामुळे धुळेकर त्यांच्याकडे केवळ एक राजकीय कार्यकर्ते म्हणून नाही, तर ‘सामाजिक एकात्मतेचे प्रतीक’ म्हणून पाहतात. या अनोख्या गणेशोत्सवामुळे शहरात एक वेगळेच कुतूहल निर्माण झाले असून, जातीय सलोखा जपण्याचा एक नवा आदर्श समोर आला आहे. श्रींच्या स्थापनेनंतर सर्व उपस्थितांनी एकत्र येत विधिवत आरती केली आणि प्रसादाचे वाटप करण्यात आले.
धुळे शहराने नेहमीच गुण्यागोविंदाने राहण्याची आणि सामाजिक सौहार्द जपण्याची परंपरा जपली आहे. मुन्ना पठाण यांच्या हस्ते झालेल्या या गणेशस्थापनेमुळे शहराच्या या परंपरेला एक वेगळीच सोन्याची झालर लाभली आहे. राजकीय आणि धार्मिक मतभेदांच्या पलीकडे जाऊन, केवळ महाराष्ट्राची संस्कृती आणि मानवता अग्रभागी ठेवून घेतलेला हा निर्णय सध्या संपूर्ण धुळे जिल्हाभरात कौतुकाचा विषय ठरत आहे. राजकीय पक्ष हे केवळ सत्ताकारणासाठी नसून ते समाजकारणाचे आणि बंधुभावाचे माध्यम असू शकतात, याचे उत्तम उदाहरण या उपक्रमातून समोर आले आहे.
गणरायाच्या या स्थापनेमुळे सर्वपक्षीय आणि सर्वधर्मीय नागरिकांमध्ये एक सकारात्मक संदेश गेला असून सोशल मीडियावरही या बातमीची लगेचच जोरदार चर्चा सुरू झाली आहे. दुष्काळाच्या संकटाशी सामना करताना, अशा प्रकारच्या सामाजिक एकात्मतेमुळे सर्वसामान्यांना एक मानसिक बळ आणि दिलासा मिळत असल्याची भावना नागरिक व्यक्त करत आहेत. मुन्ना पठाण यांनी व्यक्त केलेले हे धार्मिक ऐक्य केवळ एका दिवसापुरते मर्यादित न राहता, येणाऱ्या काळातही सर्व सण-उत्सव अशाच उत्साहात आणि प्रेमाने साजरे व्हावेत, असा विश्वास या प्रसंगी उपस्थित सर्वपक्षीय कार्यकर्त्यांनी व्यक्त केला.
या प्रसंगी शिवसेना उपजिल्हाप्रमुख नरेंद्र परदेशी, निंबा मराठे, महानगरप्रमुख धीरज पाटील, शहर संघटक अण्णा फुलपगारे, आनंद जावडेकर, सुभाष मराठे, उपमहानगरप्रमुख कपिल लिंगायत, महादू गवळी, निलेश कांजरेकर, योगेश पाटील, संजय पाटील, राजू पाटील यांच्यासह अनेक पदाधिकारी व कार्यकर्ते मोठ्या संख्येने उपस्थित होते.
