दिंडोरी अपघात – नऊ चिता, एकच गाव अन् सुन्न करणारे वास्तव

इंदोरे गावात दरगोडे कुटुंब राहते. सुनील आणि अनिल हे दोन भाऊ एकत्र राहत होते, तर त्यांचे चुलत भाऊ जवळच शेत परिसरात राहतात. लहान-मोठे मिळून २० हून अधिक सदस्य या कुटुंबात गुण्यागोविंदाने नांदत होते. वादापेक्षा एकत्र राहणे हीच त्यांची ताकद होती. शेती हा त्यांचा मुख्य व्यवसाय. या कुटुंबातील चिमणी पाखरे, म्हणजेच लहान मुले दिंडोरी येथील मविप्र विद्यालयाच्या शाळेत सेमी इंग्रजी माध्यमातून शिकत होती. तिथेच सचिन वडजे यांच्याकडे त्यांची शिकवणी सुरू होती. ही सर्व मुले अभ्यासात, खेळात तसेच सांस्कृतिक कार्यक्रमांत सक्रिय होती.

शुक्रवारी खासगी शिकवणी वर्गाचा दिंडोरी येथील राजे मंगल कार्यालय परिसरात सांस्कृतिक कार्यक्रम होता. कार्यक्रमाला जाण्यासाठी सकाळपासूनच घरात किलबिलाट सुरू होता. आजी, आई आणि काकूंची कपाटे शोधली गेली. साडीवर कोणते दागिने घालायचे याची खलबते झाली; केशरचना कशी असेल, मेकअप कसा असावा, यावर मते मांडली गेली. अखेर सायंकाळी गुणवंती, श्रेयस, श्रावणी, सृष्टी, समृद्धी आणि श्रद्धा हा किलबिल परिवार आपल्या आई-बाबा आणि काका-काकूंसोबत मोठ्या गाडीने राजे मंगल कार्यालयात पोहोचला.

तिथे गेल्यावर मनासारखे फोटोसेशन झाले आणि कार्यक्रम उत्साहात पार पडला. त्यानंतर सर्वांना घरी जाण्याचे वेध लागले. मुलांची गर्दी पाहता काही जण त्याच गाडीत बसले, तर काही दुचाकीने निघाले. परतीच्या प्रवासात रस्त्यावरील विहिरीचा कठडा लक्षात न आल्याने चारचाकी गाडी थेट विहिरीत कोसळली. क्षणात होत्याचे नव्हते झाले. लहान मुलांसह घरातील मोठी मंडळी गाडीसह पाण्यात पडल्याने एकाच कुटुंबातील नऊ जणांचा दुर्दैवी मृत्यू झाला.

हा प्रकार दरगोडे कुटुंबातील अन्य सदस्यांना समजल्यानंतर त्यांच्यावर दुःखाचा डोंगर कोसळला. घरासमोर हसत्या-खेळत्या मुलांच्या मृतदेहांसह मुलगा आणि दोन सुनांचे देह पाहून घरातील ज्येष्ठांनी हंबरडा फोडला. शनिवारी सकाळी मृतांवर अंत्यसंस्कार करण्यात आले. स्मशानभूमीत एकाच वेळी पेटलेल्या नऊ चिता पाहून उपस्थित प्रत्येक जण हळहळला.