दिवेआगरमध्ये ८ विद्यार्थ्यांचा मृत्यू; निष्काळजीपणा झाला का? कोणावर कारवाई होणार?

या दुर्घटनेनंतर मंत्री महाजन यांनी रायगड जिल्हाधिकारी तसेच पोलीस अधीक्षक यांच्याशी दूरध्वनीवरून संपर्क साधून घटनेची सविस्तर माहिती घेतली. विद्यार्थ्यांच्या सुरक्षेसाठी सहलीपूर्वी आवश्यक ती खबरदारी घेण्यात आली होती का, समुद्रकिनारी विद्यार्थ्यांना पाण्यात जाण्याची परवानगी कशी देण्यात आली, तसेच विद्यार्थ्यांसोबत असलेल्या शिक्षक व संबंधित संस्थेच्या प्रतिनिधींनी आपली जबाबदारी योग्य प्रकारे पार पाडली का, याची चौकशी करण्याचे निर्देश त्यांनी दिले. विद्यार्थ्यांच्या संख्येच्या तुलनेत देखरेखीसाठी पुरेसे शिक्षक अथवा जबाबदार व्यक्ती उपस्थित होत्या का, सुरक्षा नियमांचे पालन झाले होते का, याचीही तपासणी करण्यात यावी, असेही त्यांनी सांगितले.

सहलीची जबाबदारी संस्थेची…

शाळा, महाविद्यालये, खासगी अकादमी तसेच अन्य शैक्षणिक संस्थांकडून विद्यार्थ्यांना सहली, शैक्षणिक भेटी व अभ्यासदौऱ्यांसाठी विविध ठिकाणी नेण्यात येते. अशा वेळी समुद्र, नदी, धरण, तलाव अथवा अन्य जलस्रोतांच्या ठिकाणी विद्यार्थ्यांच्या सुरक्षेला सर्वोच्च प्राधान्य देणे आवश्यक आहे. विद्यार्थ्यांना धोकादायक किंवा खोल पाण्यात जाण्यापासून रोखणे, पुरेशी देखरेख ठेवणे आणि आवश्यक सुरक्षा उपाययोजना करणे ही संबंधित शैक्षणिक संस्थेची जबाबदारी असल्याचे मंत्री महाजन यांनी स्पष्ट केले.

शैक्षणिक सहलींसाठी मार्गदर्शन सूचना

विद्यार्थी कोणत्याही संस्थेचे असोत, त्यांना सहलीसाठी बाहेर नेताना त्यांच्या सुरक्षिततेची संपूर्ण जबाबदारी संबंधित संस्थेने स्वीकारली पाहिजे. भविष्यात अशा दुर्घटना घडू नयेत यासाठी शैक्षणिक सहलींबाबत राज्यभर स्पष्ट मार्गदर्शक सूचना तयार करून त्यांची काटेकोर अंमलबजावणी करण्यात येईल,” असेही मंत्री महाजन यांनी सांगितले.

सखोल चौकशी करून कारवाई

दुर्घटनेत मृत्युमुखी पडलेल्या विद्यार्थ्यांच्या कुटुंबीयांप्रती मंत्री महाजन यांनी शोकसंवेदना व्यक्त केली. प्रशासनाने मृत विद्यार्थ्यांच्या कुटुंबीयांना आवश्यक ती सर्व मदत उपलब्ध करून द्यावी. तसेच शवविच्छेदन व त्यानंतर मृतदेह नातेवाईकांच्या ताब्यात देण्याची प्रक्रिया संवेदनशीलतेने व तत्परतेने पूर्ण करावी, असे निर्देशही त्यांनी प्रशासनाला दिले. घटनेची वस्तुस्थिती समोर आणण्यासाठी सखोल चौकशी करून निष्काळजीपणा अथवा जबाबदारीतील त्रुटी आढळल्यास संबंधितांवर नियमानुसार कठोर कारवाई करण्यात यावी, असेही मंत्री महाजन यांनी निर्देशित केले.