रक्षा खडसेंविषयी वादग्रस्त वक्तव्य… ‘ती’ कथित क्लिप थेट भाजपच्या वरिष्ठ नेत्यांकडे; एकनाथ खडसे आक्रमक!

एकनाथ खडसे यांनी सांगितले की, त्यांनी संबंधित कथित ऑडिओ क्लिप ऐकली असून त्यामध्ये वापरण्यात आलेली भाषा अत्यंत अश्लाघ्य आणि महिलांचा अपमान करणारी आहे. अशा प्रकारची वक्तव्ये कोणत्याही राजकीय पक्षाच्या संस्कृतीला शोभणारी नाहीत. त्यांच्या मते, भाजपमध्ये पूर्वी अशा प्रकारच्या वर्तनाला कधीच स्थान नव्हते. मात्र आता पक्षात नव्याने आलेल्या काही व्यक्तींमुळे पक्षाची प्रतिमा आणि संस्कृती दोन्हीही खराब होत आहेत. खडसे यांनी विजय चौधरी यांच्यावरही गंभीर आरोप केले. ते म्हणाले की, चौधरी गेल्या २५ ते ३० वर्षांपासून दारू व्यवसायाशी संबंधित आहेत. नंदुरबार जिल्ह्यात त्यांचे कुटुंब दारूमाफिया म्हणून ओळखले जाते. अशा व्यक्तींना पक्षात महत्त्वाची जबाबदारी देण्यात आली आणि त्यांना सरचिटणीससारखे पद देण्यात आले. त्यामुळे अशा व्यक्तींची मानसिकता आणि वागणूक आता पक्षाच्या प्रतिमेवर परिणाम करत असल्याचे त्यांनी म्हटले.

भाजपच्या जुन्या आणि नव्या नेतृत्वाची तुलना करताना खडसे म्हणाले की, पूर्वी पक्षातील वरिष्ठ नेते किंवा मंत्री अशा प्रकारचे वक्तव्य कोणाकडूनही सहन करून घेत नसत. एखाद्या बैठकीत महिलांविषयी अपमानास्पद शब्द वापरले गेले असते, तर त्याच क्षणी संबंधित व्यक्तीला रोखण्यात आले असते. मात्र या कथित संभाषणात मंत्री शांतपणे सर्व काही ऐकत राहिले. त्यांनी कोणतीही हरकत घेतली नाही किंवा संबंधित व्यक्तीला थांबवण्याचा प्रयत्न केला नाही. हीच सध्याच्या भाजपच्या संस्कृतीतील मोठी घसरण असल्याची टीका खडसे यांनी केली. रक्षा खडसे यांच्याविषयी वापरण्यात आलेल्या कथित आक्षेपार्ह भाषेचा निषेध करताना हा विषय केवळ त्यांच्या सुनेपुरता मर्यादित नाही. कथित संभाषणात नंदुरबारमधील इतर महिलांबाबतही अत्यंत अशोभनीय शब्द वापरण्यात आल्याचे त्यांनी नमूद केले.

या प्रकरणात विजय चौधरी यांनी पदाचा राजीनामा दिला, हा योग्य निर्णय असल्याचे खडसे म्हणाले. मात्र एवढ्यावर हा विषय संपणार नाही. अशा प्रवृत्तीच्या अनेक व्यक्ती भाजपमध्ये असल्याचा आरोप त्यांनी केला. वर्षानुवर्षे पक्षात काम करणाऱ्या आणि महत्त्वाच्या पदांवर असलेल्या व्यक्तींकडून अशी भाषा वापरली जात असेल, तर त्याची जबाबदारी पक्षालाही घ्यावी लागेल, असे ते म्हणाले. या कथित ऑडिओ क्लिपची माहिती ते भाजपच्या वरिष्ठ नेत्यांपर्यंत पोहचवणार आहेत. आजही भाजपच्या काही वरिष्ठ नेत्यांशी आपले चांगले संबंध असल्याचे सांगत त्यांनी या घटनेची गंभीर दखल घेण्याचे आवाहन केले. पक्षात अशा घटना घडत असतील, तर त्यावर कठोर कारवाई झाली पाहिजे, असेही त्यांनी स्पष्ट केले.