नाशिकरोड मध्यवर्ती कारागृहात पूर्वीच्या भांडणाची कुरापत काढत कैद्यांमध्ये हाणामारी झाली. दोघांनी एका कैद्याच्या डोक्यात आणि डोळ्याजवळ फरशीच्या तुकड्याने हल्ला करुन जखमी केले. नाशिकरोड मध्यवर्ती कारागृहातील कैदी अमीर शमीर खान उर्फ मुर्गीराजा (३७) हा काही दिवसांपासून आजारी आहे. शनिवारी सकाळी साडेदहा वाजेच्या सुमारास वैद्यकीय उपचारासाठी जिल्हा रुग्णालयात जाण्यासाठी सर्कल क्रमांक सातच्या फाटक बाहेरून तो निघाला असता कारागृहातील खाद्यागृहाबाहेर पूर्वीच्या भांडणातून हुसेन फिरोज शेख आणि तेजस गांगुर्डे यांनी अमीरवर पाठीमागून फरशीच्या तुकड्याने हल्ला केला. डोक्यात आणि डोळ्याजवळ घाव बसल्याने अमीर जखमी झाला. या प्रकारामुळे कारागृह प्रशासनाची धावपळ उडाली. नाशिकरोड पोलीस ठाण्यात गुन्हा दाखल करण्यात आला आहे.
