पुष्पगुच्छाऐवजी वाळलेली मक्याची पेंढी; जळगावच्या शेतकऱ्यांनी रोहित पवारांसमोर मांडली दुष्काळाची व्यथा

“आज आमच्या हातात वाळलेल्या पिकाशिवाय काहीच नाही. आमची ही व्यथा सरकारपर्यंत पोहोचवा,” अशी भावना शेतकऱ्यांनी रोहित पवार यांच्याकडे यावेळी व्यक्त केली. शेतकऱ्यांच्या या भूमिकेमुळे दुष्काळी पाहणीसाठी उपस्थित असलेल्या पदाधिकाऱ्यांमध्येही भावनिक वातावरण निर्माण झाले. वाळलेल्या मक्याच्या पेंढीने केलेले स्वागत दुष्काळी परिस्थितीचे प्रतीक ठरले. शेतकऱ्यांच्या हातातील हिरवे पीक जाऊन त्याजागी वाळलेली पिके उरली आहेत. आता या परिस्थितीत शासनाकडून प्रत्यक्ष मदत कधी आणि किती मिळते, याकडे शेतकरी वर्गाचे लक्ष लागले आहे.

७० ते ८० दिवसांपासून पावसाची प्रतीक्षा

जळगाव जिल्ह्यातील चाळीसगावसह इतर बऱ्याच तालुक्यात गेल्या ७० ते ८० दिवसांपासून पावसाचा थेंब पडलेला नसल्याचे शेतकऱ्यांनी सांगितले. पावसाअभावी खरीप हंगामातील पिकांची वाढ खुंटली असून, अनेक ठिकाणी उभी पिके करपून गेली आहेत. कापूस उत्पादनावर दुष्काळसदृश परिस्थितीचा मोठा परिणाम झाल्याचे प्रशासनाच्या पाहणीतही समोर आले आहे. पावसाच्या मोठ्या खंडाचा सर्वाधिक फटका बसलेल्या पिकांमध्ये कपाशी आणि मक्याचा समावेश आहे. काही शेतांमध्ये कपाशीची झाडे अवघी फुटभर उंचीपर्यंत वाढली असून, त्यांना मोजकीच बोंडे लागलेली दिसून येत आहेत. अनेक ठिकाणी मक्याची पाने वाळून गेली असून, बाजरीचे पीकही करपल्याचे चित्र पाहणीदरम्यान दिसून आले. पिकांवर झालेल्या या परिणामामुळे उत्पादनात मोठी घट होण्याची चिन्हे असून, आर्थिक परिस्थितीबाबत चिंता व्यक्त केली जात आहे.

“पुढील आठ महिने कसे काढायचे?”

उभे पीक हातातून गेल्यानंतर शेतकऱ्यांसमोर केवळ यंदाच्या हंगामाचे नुकसान भरून काढण्याचा प्रश्न नसून पुढील अनेक महिन्यांचा उदरनिर्वाह कसा करायचा, हा प्रश्न निर्माण झाला आहे. पिकांवर झालेल्या खर्चाचा परतावा मिळण्याची शक्यता नसताना कर्ज, कुटुंबाचा खर्च, जनावरांसाठी चारा आणि आगामी हंगामाची तयारी या सर्वांचा भार शेतकऱ्यांवर येणार आहे. रोहित पवार यांनी या परिस्थितीचा संदर्भ देत शेतकऱ्यांना मदत देताना सरकारने प्रत्यक्ष शेतातील परिस्थिती, पिकांचे नुकसान आणि शेतकऱ्यांच्या आर्थिक अडचणी यांचा गांभीर्याने विचार करणे आवश्यक असल्याचे सांगितले. दुष्काळ पाहणीच्या दौऱ्यात शेतकऱ्यांच्या बांधावर जाऊन परिस्थिती समजून घेण्यावर त्यांनी भर दिला.

मदतीच्या निर्णयाकडे शेतकऱ्यांचे लक्ष

राज्यातील दुष्काळी परिस्थितीच्या पार्श्वभूमीवर सरकारने विविध तालुक्यांचा दुष्काळग्रस्त भागात समावेश केला आहे. जळगाव जिल्ह्यातील चाळीसगावसह १५ तालुक्यांचा दुष्काळग्रस्त तालुक्यांच्या यादीत समावेश करण्यात आला आहे. मात्र, प्रत्यक्ष मदत आणि नुकसानभरपाईबाबत शेतकऱ्यांचे लक्ष आता शासनाच्या पुढील निर्णयांकडे लागले आहे. रोहित पवार यांनी यापूर्वीही दुष्काळग्रस्त शेतकऱ्यांसाठी आर्थिक मदतीची मागणी केली. यावेळी आमदार सुनील भुसारा, महिला प्रदेशाध्यक्षा रोहिणी खडसे, पंकज बोराडे, जिल्हाध्यक्ष प्रमोद पाटील, महानगराध्यक्ष अशोक लाडवंजारी, प्रदेश सरचिटणीस अभिषेक देशमुख, महिला जिल्हाध्यक्ष कल्पिता पाटील, जिल्हा परिषद माजी गटनेते शशिकांत साळुंखे, शहराध्यक्ष श्याम देशमुख, सभापती ईश्वर ठाकरे, बाजार समितीचे संचालक छगन पाटील उपस्थित होते.