जळगाव : जिल्ह्यातील छत्रपती संभाजीनगर–जळगाव महामार्गावरील उमाळा घाटात गुरुवारी रात्री झालेल्या भीषण मोटार अपघातात दोन जणांचा जागीच मृत्यू झाला, तर अन्य चार जण गंभीर जखमी झाले. रात्री आठच्या सुमारास घडलेल्या या दुर्घटनेमुळे परिसरात एकच खळबळ उडाली. अपघाताची माहिती मिळताच औद्योगिक वसाहत पोलीस, रुग्णवाहिका तसेच स्थानिक नागरिकांनी घटनास्थळी धाव घेत बचावकार्य सुरू केले. गंभीर जखमी झालेल्या चौघांना तातडीने जळगाव येथील शासकीय वैद्यकीय महाविद्यालयाच्या रुग्णालयात दाखल करण्यात आले असून, त्यांच्यावर अतिदक्षता विभागात उपचार सुरू आहेत.
प्राथमिक माहितीनुसार, जळगावकडे येणारी मोटार छत्रपती संभाजीनगर महामार्गावरून भरधाव वेगाने प्रवास करत होती. या दरम्यान, महामार्गावरील उमाळा घाट उतरताना रस्त्याच्या कडेला अथवा मार्गावर मालवाहू मोटार उभी असल्याचे चालकाच्या निदर्शनास आले. अचानक समोर वाहन दिसताच संभाव्य धडक टाळण्यासाठी चालकाने तातडीने ब्रेक लावले. मात्र वाहनाचा वेग अधिक असल्याने मोटारीवरील नियंत्रण सुटले. त्यामुळे मोटार रस्त्याच्या कडेला जाऊन पलटी झाली. अपघाताचा इतका भीषण होता की, मोटारीचा मोठ्या प्रमाणात चक्काचूर झाला.
वाहनातील प्रवाशांना जबर मार बसल्याने दोघांचा घटनास्थळीच मृत्यू झाला, तर अन्य चार जण गंभीर जखमी झाले. अपघात घडताच महामार्गावरून प्रवास करणाऱ्या इतर वाहन चालकांनी तातडीने मदतीसाठी धाव घेतली. स्थानिक नागरिकांनी पोलीस नियंत्रण कक्षाला घटनेची माहिती दिली. त्यानंतर औद्योगिक वसाहत पोलिसांचे पथक, रुग्णवाहिका आणि आपत्कालीन यंत्रणा काही मिनिटांत घटनास्थळी दाखल झाली.
अपघातग्रस्त मोटारीत अडकलेल्या जखमींना नागरिक आणि पोलिसांच्या मदतीने बाहेर काढण्यात आले. त्यानंतर प्राथमिक उपचार करून त्यांना तातडीने शासकीय वैद्यकीय महाविद्यालयाच्या रुग्णालयात हलविण्यात आले. गंभीर जखमी झालेल्या प्रवाशांची प्रकृती चिंताजनक असल्याची माहिती वैद्यकीय सूत्रांनी दिली. अपघातानंतर काही काळ महामार्गावरील वाहतूक विस्कळीत झाली होती. अपघातग्रस्त वाहन रस्त्याच्या कडेला हटवून वाहतूक सुरळीत करण्यात आली.
पोलिसांनी घटनास्थळाचा पंचनामा करून अपघाताची नोंद केली असून अपघाताचे नेमके कारण शोधण्यासाठी तपास सुरू केला आहे. संबंधित मालवाहू वाहन रस्त्यावर कोणत्या कारणामुळे उभे होते, त्या वाहनावर आवश्यक इशारे अथवा परावर्तित चिन्हे होती का, तसेच चालकाची निष्काळजीपणा किंवा अन्य कोणते कारण अपघातास कारणीभूत ठरले का, याची चौकशी केली जात आहे.
दरम्यान, मृत आणि जखमींची ओळख पटविण्यासाठी पोलिसांनी रात्री उशिरापर्यंत विविध माध्यमांतून माहिती संकलित करण्याचे काम सुरू ठेवले होते. नातेवाईकांशी संपर्क साधण्याचे प्रयत्नही सुरू होते. ओळख पटविल्यानंतर मृतदेह उत्तरीय तपासणीसाठी पाठविण्यात येणार असल्याचे पोलिसांनी सांगितले. या प्रकरणी औद्योगिक वसाहत पोलिस ठाण्यात अपघाताची नोंद करण्यात आली असून सर्व बाजूंनी तपास सुरू आहे. महामार्गावर उभी वाहने, भरधाव वेग आणि अचानक निर्माण होणाऱ्या धोकादायक परिस्थितीमुळे अशा दुर्घटना टाळण्यासाठी वाहनचालकांनी अधिक सतर्कता बाळगण्याची गरज या अपघाताच्या निमित्ताने पुन्हा एकदा अधोरेखित झाली आहे.
