जळगावात मंत्री गुलाबराव पाटलांच्या दुष्काळ दौऱ्यात फरार आरोपी; रोहिणी खडसे यांच्या टीकेनंतर खळबळ

दुष्काळ पाहणी दौऱ्याच्या निमित्ताने पालकमंत्री गुलाबराव पाटील यांच्यासोबत आमदार चंद्रकांत पाटील, मोठ्या संख्येने शेतकरी आणि कार्यकर्ते उपस्थित होते. याच गर्दीत एका गुन्ह्यातील फरार आरोपी असल्याचे रोहिणी खडसे यांनी म्हटले आहे. संबंधित व्यक्तीविरुद्ध गंभीर स्वरूपाचा गुन्हा दाखल असून, त्याचा जामीन नाकारण्यात आल्याचा दावाही त्यांनी केला आहे. सदर व्यक्तीचा पोलिसांकडून शोध सुरू असताना तो पालकमंत्र्यांच्या दौऱ्यात खुलेआम सहभागी झाल्याचा आरोप करण्यात आला आहे. त्यामुळे पोलीस यंत्रणेच्या कार्यपद्धतीवरही प्रश्न उपस्थित होत आहेत. पोलिसांची उपस्थिती असलेल्या ठिकाणी फरार आरोपी सहभागी होत असेल तर त्याच्यावर कारवाई का झाली नाही, असा सवाल खडसे यांनी केला आहे.

‘सरकार आरोपींना पाठीशी घालत आहे का?’

रोहिणी खडसे यांनी या प्रकरणावरून राज्य सरकारवरही निशाणा साधला आहे. ज्या आरोपींचे जामीन अर्ज नाकारले गेले आहेत, अशा व्यक्तींना सार्वजनिक कार्यक्रमांमध्ये वावराची मुभा मिळत असेल, तर त्यामागे नेमका कोणाचा वरदहस्त आहे, असा प्रश्न त्यांनी उपस्थित केला. ‘चोर आणि गुंडांना सरकार पाठीशी घालत आहे का?’ असा सवाल करत खडसे यांनी प्रशासन आणि सरकारच्या भूमिकेवर टीका केली. या प्रकरणाची पोलिसांनी गंभीर दखल घेऊन संबंधित व्यक्तीविरुद्ध कारवाई करावी, अशी मागणीही त्यांनी केल्याचे सांगण्यात आले.

दुष्काळाच्या मुद्द्याऐवजी वेगळेच राजकारण

मुक्ताईनगर आणि बोदवड तालुक्यांमध्ये दुष्काळी परिस्थिती गंभीर असल्याच्या पार्श्वभूमीवर पालकमंत्र्यांचा हा दौरा महत्त्वाचा मानला जात होता. शेतकऱ्यांच्या अडचणी, पिकांची परिस्थिती आणि पाण्याची उपलब्धता यासंदर्भात पाहणी करण्यात आली. मात्र, दौऱ्यातील गर्दीत कथित फरार आरोपीच्या उपस्थितीवरून आता राजकीय वातावरण तापले आहे. दुष्काळ जाहीर करण्याची मागणी विरोधकांकडून सातत्याने केली जात होती. त्यानंतर दुष्काळ जाहीर झाल्यानंतर प्रत्यक्ष परिस्थितीची पाहणी करण्यासाठी पालकमंत्र्यांनी दौरा केला. याच दौऱ्यावरून आता आरोप-प्रत्यारोप सुरू झाल्याने शेतकऱ्यांच्या मूळ प्रश्नांपेक्षा राजकीय वादाला अधिक महत्त्व प्राप्त झाल्याचे चित्र आहे.

गुलाबराव पाटलांनी आरोप फेटाळले

दरम्यान, रोहिणी खडसे यांच्या आरोपांना पालकमंत्री गुलाबराव पाटील यांनी प्रत्युत्तर दिले आहे. दौऱ्यात सहभागी झालेल्या प्रत्येक व्यक्तीची गुन्हेगारी पार्श्वभूमी तपासणे हा आपला उद्देश नसल्याचे त्यांनी स्पष्ट केले. गर्दीमध्ये कोण आरोपी आहे, कोण ३०२ आणि कोण ३०७ चा गुन्हा करून आला आहे, मला वाटते माझा शेतकरी आहे,’ असे पाटील यांनी म्हटले. त्यामुळे विरोधकांनी केलेल्या आरोपांना त्यांनी राजकीय स्वरूपाचे असल्याचे सूचित केले.

गुंडांसाठी नव्हे, शेतकऱ्यांसाठी आलो होतो

‘ज्यांनी माझ्यावर आरोप केला, त्यांनी हा विचार केला पाहिजे की आम्ही कशासाठी आलो होतो. आम्ही शेतकऱ्यांसाठी आलो होतो. गुंड आमच्याबरोबर फिरावेत म्हणून आलो नव्हतो,’ असे म्हणत मंत्री पाटील यांनी रोहिणी खडसेंच्या टीकेला उत्तर दिले. दुष्काळाच्या प्रश्नावर सरकारने निर्णय घेतल्यानंतरही विरोधकांकडून वेगवेगळे मुद्दे उपस्थित केले जात असल्याचे पाटील यांनी म्हटले. दुष्काळ जाहीर करा, अशी मागणी करणाऱ्यांकडून आता दुष्काळ पाहणी दौऱ्यातील गर्दीवरून वेगळे आरोप केले जात असल्याची टीकाही त्यांनी केली.

‘गर्दी नसेल तरी टीका, गर्दी असेल तरी आरोप’

पालकमंत्री पाटील यांनी विरोधकांच्या भूमिकेवर उपरोधिक टीका केली. दौऱ्यात शेतकऱ्यांची गर्दी दिसली नसती, तर ‘पालकमंत्र्यांसोबत शेतकरी नाहीत’, अशी टीका झाली असती. मात्र, शेतकऱ्यांची मोठी गर्दी झाली असता त्यामध्ये गुन्हेगारी पार्श्वभूमीचा एखादा व्यक्ती त्यात सहभागी असल्याचा आरोप केला जात असल्याचे त्यांनी म्हटले. त्यामुळे दुष्काळ पाहणी दौऱ्याच्या मूळ उद्देशापेक्षा राजकीय आरोपांना अधिक महत्त्व दिले जात असल्याचा दावा पाटील यांनी केला.

आरोपांची पडताळणी होणे आवश्यक

दरम्यान, रोहिणी खडसे यांनी केलेल्या आरोपांमध्ये ज्या व्यक्तीचा उल्लेख करण्यात आला आहे, ती व्यक्ती नेमकी कोण आहे, तिच्यावर कोणते गुन्हे दाखल आहेत, ती सध्या पोलिसांच्या दृष्टीने फरार आहे का आणि दौऱ्यावेळी पोलिसांना तिच्या उपस्थितीची माहिती होती का, याबाबत अधिकृत पोलीस स्पष्टीकरण अद्याप समोर आलेले नाही. त्यामुळे आरोपांची अधिकृत पडताळणी होणे महत्त्वाचे ठरणार आहे. दरम्यान, दुष्काळाच्या पार्श्वभूमीवर शेतकऱ्यांच्या प्रश्नांवरून सुरू झालेला हा दौरा आता कथित फरार आरोपीच्या उपस्थितीच्या आरोपामुळे चर्चेत आला असून, आगामी काळात या मुद्द्यावरून जिल्ह्यातील राजकीय वातावरण आणखी तापण्याची शक्यता आहे.