एरंडोलच्या २३ वर्षीय आकाश त्रिवेदीची ‘आकाशाला गवसणी’; यूपीएससीत देशात ७३ वा क्रमांक!

केंद्रीय लोकसेवा आयोगाची नागरी सेवा परीक्षा देशातील सर्वात प्रतिष्ठेची आणि कठीण परीक्षा मानली जाते. दरवर्षी लाखो विद्यार्थी ही परीक्षा देतात, मात्र त्यापैकी अत्यंत कमी उमेदवार अंतिम यादीत स्थान मिळवू शकतात. अशा परिस्थितीत एरंडोलसारख्या शहरातील तरुणाने देशात ७३ वा क्रमांक मिळवत आपली बुद्धिमत्ता, मेहनत आणि चिकाटी सिद्ध केली आहे. आकाश त्रिवेदी याने भारतीय तंत्रज्ञान संस्था (आयआयटी) कानपूर येथून कॉम्प्युटर सायन्स शाखेत बीटेक पदवी प्राप्त केली आहे. आयआयटीसारख्या देशातील सर्वोच्च तांत्रिक संस्थेत शिक्षण घेत असतानाच त्याने स्पर्धा परीक्षांची दिशा ठरवली. पदवीचे शिक्षण पूर्ण झाल्यानंतर त्याची निवड देशातील अग्रगण्य व्यवस्थापन संस्था आयआयएम अहमदाबाद येथेही झाली होती. मात्र, उच्च वेतनाच्या करिअरचा मार्ग निवडण्याऐवजी देशसेवेची जाणीव ठेवत त्याने युपीएससीची वाट निवडली.

विशेष म्हणजे, आकाशने या परीक्षेसाठी कोणत्याही खासगी मार्गदर्शन वर्गाचा आधार घेतला नाही. नियोजनबद्ध अभ्यास, सातत्यपूर्ण परिश्रम, विषयांचे सखोल वाचन आणि स्व-अभ्यासाच्या जोरावर त्याने ही कठीण परीक्षा उत्तीर्ण केली. अभ्यास करताना चालू घडामोडी, इतिहास, समाजशास्त्र, अर्थव्यवस्था आणि प्रशासन या विषयांवर त्याने विशेष लक्ष केंद्रित केले होते. आकाशच्या या यशामागे त्याच्या कुटुंबियांचेही मोठे योगदान आहे. त्याच्या शिक्षण प्रवासात पालक म्हणून ॲड. ओम त्रिवेदी आणि रेखा त्रिवेदी यांनी नेहमीच मित्रवत भूमिका घेतली. मुलांवर अनावश्यक दडपण न आणता त्यांना स्वप्न पाहण्याची आणि ती पूर्ण करण्याची प्रेरणा दोघांनी दिली. लहानपणापासूनच मुलांना उत्तम शिक्षण मिळावे, वाचनाची सवय लागावी आणि देश-विदेशातील घडामोडींविषयी माहिती मिळावी यासाठी त्यांनी सातत्याने प्रोत्साहन दिले.

घरातील वातावरणही अभ्यासाला पोषक असेच होते. साधी राहणी आणि उच्च विचार या मूल्यांचा संस्कार त्यांनी मुलांमध्ये रुजवला. ज्ञानाची आवड, जिज्ञासा आणि समाजाबद्दलची जाणीव या गुणांमुळे आकाशच्या व्यक्तिमत्त्वाची जडणघडण घडली. आकाशचे वडील ॲड. ओम त्रिवेदी हे विधि क्षेत्रातील प्रस्थापित नाव असून भू-संपादन विषयातील त्यांच्या कामाची राज्यभर दखल घेतली जाते. एरंडोलसारख्या शहरातून देशातील सर्वोच्च स्पर्धा परीक्षेत उल्लेखनीय यश मिळवल्यामुळे आकाश त्रिवेदी हे नाव जिल्ह्यातील तरुणांसाठी प्रेरणादायी ठरले आहे. कठोर परिश्रम, सातत्यपूर्ण अभ्यास आणि योग्य मार्गदर्शन असल्यास कोणतेही ध्येय गाठता येते, हे त्याने सिद्ध करून दाखवले आहे. भविष्यात अधिकाधिक विद्यार्थ्यांना स्पर्धा परीक्षांसाठी प्रेरित करण्याचा त्याचा मानस आहे.