जळगाव : शहरातील सुवर्ण बाजारपेठेत अमेरिका–इराण दरम्यानच्या युद्धजन्य परिस्थितीच्या पार्श्वभूमीवर शनिवारी सोन्याच्या दरात १२ हजार रुपयांपेक्षा अधिक, तर चांदीच्या दरात २३ हजार रुपयांपेक्षा अधिक वाढ झाली होती. सोमवारी सकाळी बाजारपेठ उघडल्यावर काय स्थिती राहते, याकडे सर्वांचे लक्ष होते. प्रत्यक्षात, दोन्ही धातुंचे दर कमी झाल्याने ग्राहकांना दिलासा मिळाला.
अमेरिका आणि इस्रायलने इराणवर केलेल्या मोठ्या लष्करी कारवाईनंतर जागतिक पातळीवर मोठी खळबळ उडाली आहे. शनिवारी मोठी झेप घेतल्यानंतर सोमवारी देखील मल्टी कमोडिटी एक्सचेंजवर सोन्या-चांदीच्या किमतींमध्ये लक्षणीय वाढ नोंदविण्यात आली. वाढत्या भू-राजकीय तणावामुळे गुंतवणूकदारांनी सुरक्षित गुंतवणुकीचा पर्याय म्हणून मौल्यवान धातूंना प्राधान्य दिल्याचे चित्र दिसून आले.
देशांतर्गत फ्युचर्स मार्केटमध्येही सोने आणि चांदीच्या किमतींमध्ये वाढ झाली. आंतरराष्ट्रीय बाजारात डॉलर मजबूत होत असतानाही सुरक्षित-निवासस्थान म्हणून सोन्याची मागणी वाढल्याने दरात तेजी आली. मध्य पूर्वेतील परिस्थिती तणावपूर्णच राहण्याची शक्यता व्यक्त होत असल्याने जागतिक आर्थिक अनिश्चितता अधिक गडद झाली.
तुलनेत, जळगाव शहरातील सुवर्ण बाजारपेठेत सोने आणि चांदीच्या दरांनी अपेक्षेपेक्षा नरम भूमिका घेतल्याचे दिसून आले. आंतरराष्ट्रीय बाजारात तेजी असली तरी स्थानिक पातळीवरील मागणी तुलनेने मर्यादित राहिल्याने किरकोळ दरांमध्ये मोठी झेप दिसली नाही. त्यामुळे ग्राहकांना काही प्रमाणात दिलासा मिळाला. स्थानिक सुवर्ण व्यावसायिकांच्या माहितीनुसार, सध्या लग्नसराई आणि सणासुदीच्या खरेदीचा हंगाम सुरू असला, तरी ग्राहक सावध भूमिका घेत आहेत. दरातील अस्थिरतेमुळे मोठ्या प्रमाणावर खरेदी करण्याऐवजी गरजेपुरती खरेदी करण्याकडे अनेकांचा कल आहे.
काही ग्राहकांनी दर आणखी वाढण्याच्या भीतीने आगाऊ बुकिंगचा पर्याय स्वीकारला आहे. तज्ज्ञांच्या मते, भू-राजकीय तणाव दीर्घकाळ टिकल्यास सोन्या-चांदीच्या दरांमध्ये आणखी तेजी येण्याची शक्यता नाकारता येत नाही. मात्र, परिस्थिती नियंत्रणात आल्यास दर पुन्हा स्थिर होऊ शकतात. त्यामुळे गुंतवणूक करताना सावधगिरी बाळगणे आवश्यक आहे.
सोन्याचे दर आता कुठपर्यंत?
जळगाव शहरातील सुवर्ण बाजारपेठेत शनिवारी १२ हजार रुपयांची वाढ झाल्याने २४ कॅरेट सोन्याचे दर तीन टक्के जीएसटीसह प्रति १० ग्रॅम एक लाख ७५ हजार ९२४ रुपयांपर्यंत वधारले होते. रविवारी बाजारपेठ बंद होती. सोमवारी सकाळी बाजारपेठ उघडल्यावर ४९४४ रुपयांची घट नोंदवली गेली. त्यामुळे २४ कॅरेट सोन्याचे दर जीएसटीसह प्रति १० ग्रॅम एक लाख ७० हजार ९८० रुपयांपर्यंत खाली आले.
चांदीचे दर आता कुठपर्यंत?
जळगाव शहरातील सुवर्ण बाजारपेठेत शनिवारी २३ हजार ६९० रुपयांची वाढ झाल्याने चांदीचे दर तीन टक्के जीएसटीसह प्रति किलो तीन लाख तीन हजार ८५० रुपयांपर्यंत वधारले होते. रविवारी बाजारपेठ बंद होती. सोमवारी सकाळी बाजारपेठ उघडल्यावर २०६० रुपयांची घट नोंदवली गेली. त्यामुळे चांदीचे दर जीएसटीसह प्रति किलो तीन लाख एक हजार ७९० रुपयांपर्यंत खाली आले.
