जळगाव : जिल्ह्यात विधान परिषद निवडणुकीच्या रणधुमाळीत महायुतीसमोर बंडखोरीचे संकट आणखी गडद होताना दिसत आहे. भाजपकडून नंदकिशोर महाजन यांना उमेदवारी जाहीर झाल्यानंतर महायुतीतील नाराजी आणि अपक्ष उमेदवारांच्या वाढत्या संख्येमुळे निवडणुकीचे गणित अधिकच गुंतागुंतीचे बनले आहे. ठाकरे गटाचे उमेदवार शरद तायडे आणि तुल्यबळ अपक्ष उमेदवार अनिल चौधरी हे मैदानात उतरले असताना महायुतीच्या मतांमध्ये फूट पडू नये, यासाठी संकटमोचक गिरीश महाजन यांची गुरुवारी सकाळपासूनच धावपळ सुरू होती.
विधान परिषदेसाठी उमेदवारी अर्ज दाखल करण्याच्या प्रक्रियेदरम्यान अनेक इच्छुकांनी अपक्ष म्हणून रिंगणात उतरण्याचा निर्णय घेतला. त्यामुळे निवडणूक सरळ महायुती विरुद्ध महाविकास आघाडी अशी न राहता स्थानिक असंतोष, गटबाजी आणि बंडखोरी यांच्या भोवती फिरू लागली आहे. विशेषतः भुसावळचे माजी आमदार संतोष चौधरी यांचे बंधू अनिल चौधरी यांनी अपक्ष उमेदवारी दाखल केल्याने महायुतीच्या गोटात खळबळ उडाली. चौधरी कुटुंबाचा स्थानिक राजकारणातील प्रभाव आणि कार्यकर्त्यांमधील संपर्क लक्षात घेता त्यांच्या उमेदवारीमुळे काही प्रमाणात मतांचे विभाजन होऊ शकते, अशी भीती व्यक्त केली जात आहे.
सध्याची परिस्थिती लक्षात घेऊन भाजप नेते मंत्री गिरीश महाजन यांनी स्वतः जळगावमध्ये ठाण मांडत नाराज इच्छुकांची समजूत काढण्याचे प्रयत्न सुरू केले. महाजन हे उत्तर महाराष्ट्रातील भाजपचे संकटमोचक म्हणून ओळखले जातात. त्यामुळे जळगावमधील बंडखोरी नियंत्रणात आणण्याची जबाबदारीही त्यांच्यावरच आली आहे. गुरुवारी दिवसभर त्यांनी विविध नेते, पदाधिकारी आणि बंडखोर उमेदवारांशी संपर्क साधून महायुतीची एकजूट कायम ठेवण्याचा प्रयत्न केला. दरम्यान, महायुतीसाठी दिलासादायक घडामोड म्हणजे राष्ट्रवादी काँग्रेस अजित पवार गटातील तिन्ही बंडखोर उमेदवारांनी आपली उमेदवारी मागे घेतली आहे. गेल्या काही दिवसांपासून सुरू असलेल्या चर्चेनंतर या बंडखोरांनी अखेर माघार घेतल्याने महायुतीच्या निवडणूक व्यवस्थापनाला मोठा दिलासा मिळाला आहे.
गिरीश महाजन यांच्या शिष्टाईला यश आल्याची चर्चा राजकीय वर्तुळात रंगली असून या निर्णयामुळे महायुतीच्या मतांमध्ये होणारे संभाव्य विभाजन काही प्रमाणात टळल्याचे मानले जात आहे. मात्र, सर्वच अडथळे दूर झालेले नाहीत. शिंदे गटाच्या नगरसेविका रेश्मा काळे यांनी अद्यापही निवडणूक लढवण्याचा निर्धार कायम ठेवला आहे. महिलांना राजकीय प्रक्रियेत अधिक संधी आणि प्रतिनिधित्व मिळावे, या भूमिकेवर त्या ठाम असल्याचे त्यांच्या समर्थकांचे म्हणणे आहे. त्यामुळे त्यांनी उमेदवारी अर्ज कायम ठेवण्याचा निर्णय घेतला असून यामुळे महायुतीच्या गोटात चिंता वाढली आहे. रेश्मा काळे या महायुतीशी संबंधित शिंदे गटातील असल्याने त्यांच्या उमेदवारीचा थेट परिणाम महायुतीच्या मतांवर होण्याची शक्यता राजकीय विश्लेषक व्यक्त करत आहेत.
जळगाव शहर आणि परिसरातील महिला मतदार तसेच स्थानिक पातळीवरील त्यांच्या समर्थकांचा काही प्रमाणात प्रभाव असल्याचे मानले जाते. त्यामुळे त्या निवडणुकीच्या मैदानात कायम राहिल्यास महायुतीच्या पारंपरिक मतदारांमध्ये विभागणी होऊ शकते. याच कारणामुळे भाजप आणि महायुतीतील वरिष्ठ नेत्यांकडून त्यांची समजूत काढण्याचे प्रयत्न सुरू असल्याची माहिती सूत्रांकडून मिळत आहे. विशेष म्हणजे अर्ज माघारीच्या अंतिम दिवशी रेश्मा काळे या अज्ञात स्थळी सहलीसाठी रवाना झाल्यामुळे त्यांच्याशी संपर्क साधण्यात अडचणी निर्माण झाल्याचे सांगितले जात आहे. अनेक नेत्यांनी त्यांच्याशी संपर्क साधण्याचा प्रयत्न केला असला तरी त्या उपलब्ध होत नसल्याने त्यांच्या अंतिम भूमिकेबाबत संभ्रम कायम आहे. उमेदवारी अर्ज माघारीनंतर अंतिम चित्र स्पष्ट होणार असले, तरी सध्या तरी महायुतीसमोर बंडखोरी रोखणे आणि मतांची एकजूट राखणे हे सर्वात मोठे आव्हान बनले आहे.
