तरुणांना रोजगाराची संधी… जळगाव शहरात ई–बस सेवेसाठी मोठी पद भरती

महापालिकेकडून जळगाव शहर व परिसरातील प्रवाशांना नियमित, सुरक्षित आणि दर्जेदार सेवा देण्यावर भर दिला जात आहे. ई–बस सेवेच्या दैनंदिन संचालनासाठी प्रशिक्षित मनुष्यबळाची गरज ओळखून १२० वाहकांची नियुक्ती करण्याचा निर्णय घेण्यात आला आहे. या संदर्भातील सविस्तर अटी व शर्ती २३ फेब्रुवारी २०२६ पासून अधिकृत संकेतस्थळावर उपलब्ध करून देण्यात आल्या असून, इच्छुक व पात्र पुरवठादारांना ऑनलाईन पद्धतीने निविदा सादर करता येणार आहेत. प्रशासनाच्या पातळीवर पारदर्शकता राखण्यासाठी संपूर्ण प्रक्रिया ई–निविदा प्रणालीद्वारे राबवण्यात येत आहे. तांत्रिक पात्रता, आर्थिक अर्हता, अनुभव, मनुष्यबळ पुरवठ्याची क्षमता आदी बाबींची छाननी करूनच अंतिम निर्णय घेतला जाणार आहे. महानगरपालिकेचे आयुक्त ज्ञानेश्वर ढेरे यांनी कोणत्याही टप्प्यावर निविदा स्वीकारण्याचा अथवा रद्द करण्याचा अधिकार स्वतःकडे राखून ठेवला आहे. त्यामुळे निवड प्रक्रियेत काटेकोरपणा राखला जाणार असल्याचे संकेत मिळत आहेत.

पायाभूत सुविधा अंतिम टप्प्यात

ई–बस सेवेच्या प्रकल्पासाठी आवश्यक असलेल्या पायाभूत सुविधांची उभारणी वेगाने सुरू असून, ई–बस आगाराच्या वाहनतळाचे सुमारे ९० टक्के काम पूर्ण झाले आहे. चार्जिंग स्टेशन, विद्युत पुरवठा यंत्रणा, देखभाल केंद्र, नियंत्रण कक्ष आदी सुविधा उभारण्याचे कामही अंतिम टप्प्यात आले आहे. लवकरच बस गाड्यांचा ताफा शहरात दाखल होण्याची शक्यता आहे. जळगाव शहरासाठी एकूण ५० ई–बस मंजूर करण्यात आल्या आहेत. त्यापैकी पहिल्या टप्प्यात ३० बसेस प्रवाशांच्या सेवेत दाखल होणार आहेत. या ३० बसेसमध्ये १२ मीटर लांबीच्या २४ मोठ्या प्रवासी क्षमतेच्या बसेस आणि नऊ मीटर लांबीच्या सहा मध्यम आकाराच्या बसेसचा समावेश असेल. मोठ्या बसेस मुख्य मार्गांवर धावणार असून, मध्यम आकाराच्या बसेस उपनगर व अंतर्गत भागांसाठी उपयोगी ठरणार आहेत.

प्रवाशांना आधुनिक सुविधा

ई–बस सेवेअंतर्गत प्रवाशांना आरामदायी आसन व्यवस्था, सीसीटीव्ही कॅमेरे, जीपीएस प्रणाली, डिजिटल तिकीट प्रणाली यांसारख्या आधुनिक सुविधांचा लाभ मिळणार आहे. यामुळे प्रवास अधिक सुरक्षित आणि सोयीस्कर होणार आहे. वेळेचे काटेकोर पालन, निश्चित मार्ग आणि नियमित फेऱ्या यामुळे नागरिकांचा सार्वजनिक वाहतुकीकडे कल वाढण्याची अपेक्षा आहे.
डिझेल बस गाड्यांच्या तुलनेत ई–बस या पूर्णपणे विद्युत उर्जेवर चालणाऱ्या असल्याने वायू आणि ध्वनी प्रदूषणात मोठी घट होणार आहे. शहरातील वाढत्या प्रदूषणाच्या पार्श्वभूमीवर हा प्रकल्प महत्त्वाचा ठरणार आहे. कार्बन उत्सर्जन कमी करून हरित शहराच्या दिशेने वाटचाल करण्यासाठी ई–बस सेवा उपयुक्त ठरेल, असा विश्वास प्रशासनाने व्यक्त केला आहे.

स्थानिक तरुणांना थेट रोजगार

१२० वाहकांच्या नियुक्तीमुळे स्थानिक तरुणांना थेट रोजगार उपलब्ध होणार आहे. तसेच अप्रत्यक्षरित्या देखभाल, तांत्रिक सेवा, व्यवस्थापन, सुरक्षा आदी क्षेत्रांमध्येही रोजगार निर्मिती होण्याची शक्यता आहे. त्यामुळे हा प्रकल्प केवळ वाहतूक सुधारणा न राहता रोजगार निर्मितीचाही एक महत्त्वाचा टप्पा ठरणार आहे. एकूणच, जळगाव महानगरपालिकेची ई–बस सेवा ही शहराच्या सार्वजनिक वाहतूक व्यवस्थेत नवे पर्व सुरू करणारी ठरणार असून, पर्यावरणपूरक विकास आणि रोजगार निर्मिती या दोन्ही बाबींना चालना देणारी ठरणार असल्याचे चित्र स्पष्ट होत आहे.