खासदारांना निवेदन… जळगाव स्थानकावर दादर–बलिया, गोरखपूर विशेष रेल्वे गाड्यांना थांबा का नाही?

धरणगाव तालुका प्रवासी मंडळाने ०१०२५/२६ दादर–बलिया स्पेशल एक्सप्रेस आणि ०१०२७/२८ दादर–गोरखपूर स्पेशल एक्सप्रेस या गाड्यांना जळगाव रेल्वे स्थानकावर अधिकृत थांबा देण्याची मागणी केली आहे. याबाबत मंडळाने जळगावच्या खासदार स्मिता वाघ यांना निवेदन देत तातडीने पाठपुरावा करण्याची विनंती केली आहे. मुंबई आणि उत्तर प्रदेशदरम्यान मोठ्या प्रमाणावर स्थलांतरित कामगार, विद्यार्थी, व्यावसायिक तसेच नियमित प्रवासी ये-जा करतात. विशेषतः पूर्व उत्तर प्रदेशातील गोरखपूर, बलिया परिसरात नोकरी, शिक्षण व खासगी कारणांसाठी जाणाऱ्या प्रवाशांची संख्या लक्षणीय आहे. त्यामुळे दादर–गोरखपूर आणि दादर–बलिया या मार्गांवरील गाड्यांना नेहमीच प्रचंड मागणी असते.

०१०२७ दादर–गोरखपूर विशेष ही गाडी दर मंगळवारी, गुरुवारी, शनिवारी आणि रविवारी धावते, तर ०१०२८ गोरखपूर–दादर विशेष दर सोमवारी, मंगळवारी, गुरुवारी आणि शनिवारी चालविली जाते. तसेच ०१०२५ दादर–बलिया विशेष ही गाडी दर सोमवारी, बुधवारी आणि शुक्रवारी धावते, तर ०१०२६ बलिया–दादर विशेष ही गाडी दर बुधवारी, शुक्रवारी आणि रविवारी उपलब्ध आहे. या गाड्यांमध्ये आरक्षणासाठी मोठी स्पर्धा असल्याने वेटिंग लिस्ट लांबते. आणि अनेक प्रवाशांना तातडीच्या प्रवासासाठी अडचणींचा सामना करावा लागतो.

जळगावच्या प्रवाशांची गैरसोय

सध्या जळगाव ते मुंबई दरम्यान रात्रीच्या गाड्यांमध्ये प्रवास करणे अत्यंत कठीण झाले आहे. उपलब्ध गाड्या बहुतांश लांब पल्ल्याच्या असल्याने त्यामध्ये जागा मिळणे अवघड ठरते. विशेषतः कामगार आणि विद्यार्थ्यांना अचानक प्रवास करायचा असल्यास त्यांच्यासाठी पर्याय मर्यादित राहतात. मुंबईकडून जळगावकडे परतताना देखील सोयीस्कर वेळेची गाडी नसल्याने प्रवाशांना उशिरापर्यंत प्रतीक्षा करावी लागते किंवा बदल्या गाड्यांचा आधार घ्यावा लागतो. धरणगाव प्रवासी मंडळाच्या म्हणण्यानुसार, दादर–गोरखपूर आणि दादर–बलिया या दोन्ही विशेष गाड्यांना जळगाव येथे थांबा मिळाला, तर रात्री मुंबईकडे जाणाऱ्या प्रवाशांना तसेच दुपारी मुंबईहून जळगावकडे येणाऱ्यांना मोठा दिलासा मिळेल. यामुळे गर्दीचे प्रमाण काही प्रमाणात कमी होईल आणि आरक्षणाची समस्या देखील सुसह्य होईल.

जळगावचे व्यापारी केंद्र म्हणून महत्त्व

जळगाव हे उत्तर महाराष्ट्रातील एक प्रमुख व्यापारी केंद्र असून कापूस, केळी व इतर कृषी उत्पादनांच्या व्यापारासाठी ओळखले जाते. तसेच येथे उच्च शिक्षणासाठी विविध महाविद्यालये आणि प्रशिक्षण संस्था असल्याने विद्यार्थ्यांची मोठी वर्दळ असते. या पार्श्वभूमीवर अतिरिक्त गाड्यांचा थांबा मिळाल्यास व्यापारी, विद्यार्थी आणि नोकरदार वर्गाला मोठी सोय होईल, असा विश्वास व्यक्त करण्यात येत आहे. धरणगाव तालुका प्रवासी मंडळाने प्रवाशांच्या हिताचा विचार करून तातडीने या मागणीस मान्यता द्यावी, अशी अपेक्षा खासदार स्मिता वाघ यांच्याकडे व्यक्त केली आहे.

विशेष गाड्यांच्या सेवांना मुदतवाढ देण्याचा निर्णय स्वागतार्ह असला, तरी त्या गाड्यांचा लाभ जास्तीत जास्त प्रवाशांना मिळावा यासाठी स्थानिक पातळीवरील गरजांचा विचार करणे आवश्यक असल्याचे मत प्रवासी वर्गातून व्यक्त होत आहे. आता रेल्वे प्रशासन या मागणीवर काय निर्णय घेते, याकडे जळगाव जिल्ह्यातील हजारो प्रवाशांचे लक्ष लागले आहे.