जळगाव : रेल्वे मार्गावरील समांतर पुलासाठी वाहतूक काही काळासाठी वळवणार… पर्यायी मार्ग कोणते?

जळगाव शहरातील सर्वाधिक वर्दळीच्या मार्गांपैकी एक असलेल्या जुन्या महामार्गावर मोठ्या प्रमाणात खोदकाम आणि पुलाच्या संरचनेचे काम हाती घेतले जाणार असल्याने वाहतूक सुरळीत ठेवणे हे प्रशासनापुढील मोठे आव्हान आहे. त्यामुळे प्रत्यक्ष जागेवर पाहणी करून वाहतूक कोणत्या मार्गाने वळवायची, कोणत्या ठिकाणी बॅरिकेडिंग करायचे आणि वाहतूक कोंडी टाळण्यासाठी कोणती उपाययोजना करायची, याचा सविस्तर आराखडा तयार केला जाणार आहे.

अवजड आणि शहरांतर्गत वाहतुकीसाठी स्वतंत्र पर्याय

प्राथमिक नियोजनानुसार, जळगाव शहरातून जाणारी अवजड वाहने पाळधी-तरसोद बायपासमार्गे वळविण्याचा प्रस्ताव आहे. त्यामुळे शहरातील मुख्य रस्त्यांवरील ताण कमी होण्यास मदत होईल. तर शहरांतर्गत चारचाकी, दुचाकी आणि इतर हलक्या वाहनांसाठी पिंप्राळा, गणेश कॉलनी आणि निमखेडी शिवार या मार्गांचा पर्याय वापरण्याचा विचार सुरू आहे. मात्र, अंतिम निर्णय संयुक्त पाहणीनंतर घेतला जाणार असल्याचे अधिकाऱ्यांनी सांगितले. भुयारी मार्गाचे काम सुरू झाल्यानंतर शहरातील दैनंदिन वाहतुकीवर मोठा परिणाम होण्याची शक्यता आहे. त्यामुळे पाचही विभागांचे अधिकारी प्रत्यक्ष स्थळ पाहणी करून प्रत्येक पर्यायी मार्गाची रुंदी, वाहतूक क्षमता, वळणांची स्थिती, विद्युत खांब, पाणीपुरवठा वाहिन्या तसेच इतर तांत्रिक बाबींचा अभ्यास करणार आहेत. आवश्यक तेथे तात्पुरते रस्ते तयार करणे किंवा अडथळे दूर करण्याचाही विचार होणार आहे.

रखडलेल्या कामाला मिळणार वेग

शिव कॉलनी उड्डाणपूल आणि भुयारी मार्गाचे काम गेल्या काही महिन्यांपासून अत्यंत संथ गतीने सुरू असल्याने नागरिकांकडून तीव्र नाराजी व्यक्त होत होती. वाढती वाहतूक, धुळीचे साम्राज्य आणि अरुंद झालेल्या मार्गामुळे वाहनचालकांना मोठा त्रास सहन करावा लागत आहे. याच पार्श्वभूमीवर महापौर दीपमाला काळे यांनी महारेल प्रशासनाला पत्र पाठवून कामाला गती देण्याची मागणी केली होती. त्यानंतर चार महिन्यांनी महारेलचे सल्लागार अरविंद पटेल यांनी महापौरांची भेट घेऊन संपूर्ण प्रकल्पाचे सादरीकरण केले. यावेळी नगरसेविका शुचिता हाडा यांच्यासह संबंधित अधिकाऱ्यांना कामाच्या प्रगतीची आणि पुढील नियोजनाची माहिती देण्यात आली.

पावसाळ्यानंतर प्रत्यक्ष कामाला वेग

सध्या पावसामुळे मोठ्या प्रमाणावर बांधकाम करणे शक्य नसल्याने मुख्य काम थांबविण्यात आले आहे. मात्र, पावसाळा संपताच भुयारी मार्ग आणि समांतर पुलाच्या कामाला वेग देण्यात येणार आहे. त्यासाठी वाहतूक वळविण्याची प्रक्रिया आधी पूर्ण करण्यात येणार असून, त्यानंतर मोठ्या प्रमाणावर यंत्रसामग्री आणि मनुष्यबळासह काम हाती घेतले जाणार आहे. वाहतूक वळविल्यानंतर काही काळ जळगाव शहरातील नागरिकांना पर्यायी मार्गांचा वापर करावा लागणार असून, काही प्रमाणात वाहतूक कोंडीची शक्यता नाकारता येत नाही. मात्र, प्रशासनाच्या मते हा तात्पुरता त्रास असून भुयारी मार्ग आणि समांतर पूल पूर्ण झाल्यानंतर शिव कॉलनी परिसरातील वाहतूक कोंडी आणि अपघात मोठ्या प्रमाणात कमी होतील.