मालेगाव: येथील सटाणा नाका परिसरातील एका खासगी रुग्णालयात अल्पवयीन मुलीची बेकायदेशीर प्रसूती करून नवजात बालिकेची विक्री करण्याचा धक्कादायक प्रकार काही जागरूक नागरिकांमुळे उधळला गेला आहे. या प्रकरणी अटकेत असलेल्या सामान्य रुग्णालयाचे निवृत्त वैद्यकीय अधीक्षक डॉ. किशोर डांगे यांच्यासह ९ संशयीतांच्या पोलीस कोठडीत न्यायालयाने १६ जूनपर्यंत वाढ केली आहे. दरम्यान, या प्रकरणात पोलीस तपासात अत्यंत धक्कादायक आणि चीड आणणारी माहिती समोर आली आहे. पीडित अल्पवयीन मुलीच्या आईच्या नराधम प्रियकरापासून तिला गर्भधारणा झाल्याचे उघड झाले आहे.
मिळालेल्या माहितीनुसार,७ जून रोजी डॉ. डांगे यांच्या खासगी रुग्णालयात एका १६ वर्षीय अल्पवयीन मुलीची प्रसूती करण्यात आली. ही मुलगी कायदेशीररीत्या अल्पवयीन असल्याची पूर्ण कल्पना असूनही रुग्णालय प्रशासनाने ‘पोक्सो’ कायद्याचे उल्लंघन केले. अशा संवेदनशील प्रकरणांची माहिती पोलिसांना किंवा आरोग्य विभागाला देणे बंधनकारक असतानाही, डॉक्टरांनी ती जाणीवपूर्वक दडपून ठेवली. प्रसूतीनंतर मुलीची ओळख लपवण्यासाठी तिला अज्ञातस्थळी हलवण्यात आले, तर नवजात बालिकेला बेकायदेशीर विक्रीसाठी रुग्णालयातच ठेवण्यात आले होते,असा आरोप आहे.
काही जागरूक नागरिकांना याची कुणकुण लागल्यावर पोलीस व आरोग्य प्रशासनाला त्याची माहिती देण्यात आली. त्यानंतर पोलिसांनी या हॉस्पिटलवर छापा टाकून कारवाई केली. सामान्य रुग्णालयाचे वैद्यकीय अधीक्षक डॉ. जितेंद्र डोलारे यांनी या संदर्भात कॅम्प पोलीस ठाण्यात तक्रार दाखल केली. त्यानुसार पोलिसांनी डॉ. किशोर डांगे, त्यांची मुलगी डॉ. किशोरी डांगे, डॉ. अनुजा शेवाळे, डॉ. प्रिती जाधव यांच्यासह १२ जणांवर गुन्हा दाखल केला आहे. त्यापैकी ७ जून रोजी अटक केलेल्या ९ संशयीतांची पोलीस कोठडी संपत असल्याने त्यांना शुक्रवारी (१२ जून) पुन्हा न्यायालयासमोर हजर केले असता, न्यायालयाने त्यांची पोलीस कोठडी १६ जूनपर्यंत वाढवून दिली. या प्रकरणातील एक संशयित अद्याप फरार आहे.
आईचा प्रियकरच निघाला नराधम!
या गुन्ह्याचा तपास करताना पोलिसांच्या हाती अत्यंत संतापजनक माहिती लागली. पीडित अल्पवयीन मुलीला गर्भवती करणारा दुसरा तिसरा कोणी नसून तिच्याच आईचा प्रियकर असल्याचे निष्पन्न झाले. हा संशयीत हैदराबाद येथील एका खासगी कंपनीत नोकरीस आहे. मालेगाव पोलिसांनी तातडीने चक्र फिरवत हैदराबाद येथून पीडित मुलीच्या आईला आणि तिच्या प्रियकराला ताब्यात घेतले. या दोघांना अटक करून गुरुवारी न्यायालयात हजर केले असता, त्यांना १५ जूनपर्यंत पोलीस कोठडी सुनावण्यात आली आहे. या प्रकरणी कॅम्प पोलीस ठाण्याचे साहाय्यक पोलीस निरीक्षक पंकज निकम यांच्या मार्गदर्शनाखाली उपनिरीक्षक विजया पवार या अधिक तपास करीत आहेत
