महाराष्ट्र नवनिर्माण सेनेचे अध्यक्ष राज ठाकरे दोन दिवसांच्या उत्तर महाराष्ट्र दौऱ्यावर आहेत. हा राजकीय दौरा नसल्याचं राज ठाकरे यांनी सांगितलं आहे. मात्र, आगामी नाशिक महापालिका निवडणुकीच्या पार्श्वभूमीवर राज ठाकरे मनसे पदाधिकारी आणि कार्यकर्त्यांची बैठक घेणार आहेत. राज ठाकरे यांनी नाशिकला येण्यापूर्वी शनिवारी शिर्डी येथे साईबाबांच्या समाधीचे दर्शन घेतले होते. त्यानंतर आज ( २ ऑक्टोंबर ) राज ठाकरेंनी पत्नी शर्मिला ठाकरे यांच्यासह वणी येथील आदिशक्ती सप्तश्रृंगीदेवीचे दर्शन घेतलं आहे. यावेळी त्यांच्यासमवेत मनसेचे पदाधिकारीही उपस्थित होते. दरम्यान, १५ दिवसांपूर्वी राज ठाकरेंनी विदर्भ दौरा केला आहे. यावेळी त्यांनी नागपूर, चंद्रपूर, वर्धा, अमरावती येथील पदाधिकारी आणि कार्यकर्त्यांच्या बैठका घेतल्या. तसेच, आगामी महापालिका निवडणुकांसाठी कामाला लागण्याचा संदेशही राज ठाकरेंनी पदाधिकाऱ्यांना दिला आहे.