तुमच्या दुधात घातक रसायने तर नाही? दुधाचे प्रमाण वाढविण्यासाठी भेसळ…नंदुरबारमध्ये सुरु होता राजरोस धंदा !

स्थानिक गुन्हे शाखेच्या पथकाने गोपनीय माहितीच्या आधारे नंदुरबार शहरातील गवळी वाडा परिसरात छापा टाकून घातक रसायनांचा साठा जप्त केला. या रसायनांना एकत्र करुन ते रसायन इंजेक्शनद्वारे दुभत्या जनावरांना देवून जनावरांचे दुधाचे प्रमाण वाढविले जात होते. या दुधामुळे मानवी जीवितास धोका निर्माण होण्याची दाट शक्यता असते. या प्रकरणात दोन जणांना अटक करण्यात आली. त्यांच्याकडुन २० लाखांचा मुद्देमाल जप्त करण्यात आला आहे. नंदुरबार पोलिसांच्या स्थानिक गुन्हे शाखेच्या पथकांने अन्न व औषध प्रशासन विभागाच्या मदतीने नंदुरबार शहरातील नवा गवळीवाडा परिसरात एका घरावर छापा टाकून त्या घराशेजारील गोदाामातून घातक रसायनांचा साठा जप्त केला.

पोलिसांनी छापा टाकला. तेव्हा पश्चिम बंगाल राज्यातील आशिक लियाकत सरदार ही व्यक्ती बाटल्यांमध्ये रसायन भरतांना आढळली. हे रसायन पातळ करुन ते इंजेक्शनमध्ये भरुन गायी, म्हशींना दिले जात होते. हे इंजेक्शन दुभत्या जनावरांना दिल्यानंतर जनावरांमध्ये दुधाचे प्रमाण वाढते. परंतु, अशा प्रकाराने निर्माण झालेले दूध मानवी आरोग्यास धोका निर्माण होण्याची शक्यता असते. त्यामुळेच पोलिसांनी या घराचे मालेक तुकाराम गवळी आणि आशिक लियाकत सरदार या दोघांना अटक केली. जनावरांचे दुधाचे प्रमाण वाढविणे आणि सदर रसायनांमुळे तयार होणारे भेसळयुक्त दूध हे मानवी जीवितास धोकादायक असल्याचे तसेच तयार केलेल्या रसायनामुळे दुभत्या जनावरांच्याही जीवितास धोका होऊ शकतो, हे माहीत असतांना देखील त्यांनी सदरचे कृत्य केल्याने त्यांचेविरुध्द नंदुरबार शहर पोलीस ठाणे येथे गुन्हा दाखल करण्यात आला.

गुन्ह्याचा पुढील अधिक तपास सुरू आहे. या कारवाईत पोलिसांनी जवळपास २० लाखांचा मुद्देमाल जप्त केला आहे. स्थानिक गुन्हे शाखेच्या या कारवाई नंतर नंदुरबार जिल्हा पोलीस अधीक्षक श्रवणदत्त एस. यांनी स्वत: याबाबत लक्ष घातले असून संबंधित माल कुठून आला, आणि कोणाला विक्री केला जात होता,. याबाबत पोलीस तपास करीत आहेत.. दूध वाढविण्यासाठी वापरल्या जाणाऱ्या या रासायनिक इंजेक्शनच्या टोळीच्या कारवाया उघड झाल्याने शहरात विक्री होत असलेल्या भेसळयुक्त दुधाबाबत भीतीचे वातावरण निर्माण झाले आहे. अशातच अन्न व औषध प्रशासन विभागाच्या कर्मचारी, अधिकाऱ्यांनी याबाबत अधिक सजगता दाखवून स्वत: शहरातील दूध डेअरींवर भेसळयुक्त दुधाची तपासणी करण्याची गरज देखील व्यक्त होत आहे.