Nashik Mayor Election : नाशिकमध्ये नवा ट्विस्ट! महापौर भाजपचाच, मग खरी चुरस ‘विरोधी पक्षनेते’पदासाठी का?

महापौर, उपमहापौर निवडीसाठी शुक्रवारी सकाळी ११ वाजता विशेष सभा होणार आहे. महापौरपदासाठी भाजपच्या हिमगौरी आहेर-आडके आणि ठाकरे गटाकडून सीमा पवार तर उपमहापौर पदासाठी भाजपचे मच्छिंद्र सानप, शिंदे गटाचे प्रवीण तिदमे, विलास शिंदे आणि राहुल दिवे यांनी अर्ज दाखल केले आहेत. १२२ सदस्यांच्या महापालिकेत ७२ जागा मिळवणाऱ्या भाजपकडे बहुमत आहे.

विरोधी शिंदे गट (२६), राष्ट्रवादी अजित पवार गट (चार), ठाकरे गट (१५), काँग्रेस (तीन), मनसे आणि अपक्ष प्रत्येकी एक असे संख्याबळ आहे. महापौरपद सर्वसाधारण महिला गटासाठी आरक्षित आहे. भाजपकडे बहुमतापेक्षा १० नगरसेवक जास्त असल्याने ही निवडणूक औपचारिकता मानली जात होती. परंतु, भाजपमधील पक्षांतर्गत मतभेद आणि शिंदे गटाशी वरिष्ठ पातळीवरील चर्चा यामुळे अखेरच्या क्षणी नवीन समीकरणे आकारास येण्याची शक्यता व्यक्त होत आहे.

शिंदे गट भाजपसमवेत सत्तेत सहभागी झाल्यास त्याखालोखाल जागा मिळवणाऱ्या ठाकरे गटाकडे विरोधी पक्षनेतेपद जाईल. शिंदे गट सत्तेत सहभागी न झाल्यास संख्याबळाच्या आधारे विरोधी पक्षनेतेपद त्यांच्याकडे राहणार आहे. शिंदे गटातील सर्व नगरसेवकांची शुक्रवारी सकाळी पक्ष कार्यालयात बैठक होणार आहे. वरिष्ठांकडून जो निर्णय येईल, त्यानुसार अंमलबजावणी केली जाणार असल्याचे उपनेते तथा जिल्हाप्रमुख अजय बोरस्ते यांनी सांगितले.

गट नोंदणीची धडपड…

पक्ष आणि गटाच्या संख्याबळाच्या आधारे विविध समित्यांमध्ये प्रतिनिधित्व मिळते. त्यामुळे शिंदे गटाने मनसेच्या एका नगरसेवकाला बरोबर घेऊन गट नोंदणी केली. यामुळे त्यांचे एकत्रित संख्याबळ २७ वर पोहोचले असून स्थायी समितीत चार सदस्यांना प्रतिनिधित्व मिळू शकते. अन्य समित्यांमध्ये याचा लाभ होईल, असे सांगितले जाते. ठाकरे गटाने काँग्रेसच्या तीन नगरसेवकांसमवेत गट स्थापन केला आहे. त्यांचीही विविध समित्यामध्ये अधिकतम प्रतिनिधित्व मिळविण्याची धडपड आहे. तर गुरुवारी राष्ट्रवादी अजित पवार गटाच्या नगरसेविका म्हणून डॉ. हेमलता पाटील यांनी स्वतंत्र नोंदणी केली.