Nashik MLC Election : “शिवसेनेचा केसाने गळा कापला”, नाशिकमध्ये पराभूत नरेंद्र दराडे यांचे पुत्र कुणाल दराडे यांचा रोख कुणावर?

विधान परिषदेच्या नाशिक मतदारसंघासाठी ६१९ पैकी ६१८ मतदारांनी मतदानाचा हक्क बजावला. या निवडणुकीत महायुतीकडून शिवसेना एकनाथ शिंदे गटाचे नरेंद्र दराडे उमेदवार होते. दुसरीकडे माघार घेऊनही मतपत्रिकेवर नाव कायम राहिलेले भाजपचे बंडखोर प्रसाद हिरे आणि अपक्ष गोकुळ गिते यांची उमेदवारी होती. विरोधी उमेदवार रिंगणात नाही. एक बंडखोर आणि एक अपक्ष दोघांनीही माघार घेतलेली. असे असताना नरेंद्र दराडे यांचा विजय निश्चित मानला जात होता. परंतु, कागदावरील गणित प्रत्यक्षात उतरेलच असे नाही. राजकारणात तर तसे बिल्कूलही गृहित धरता येत नाही. तोच अनुभव निवडणूक निकालानंतर उमेदवार नरेंद्र दराडे यांना आला. आपल्याशी विश्वासघात झाला, अशी प्रतिक्रिया त्यांनी व्यक्त केली.

दुसरीकडे, पराभूत उमेदवार नरेंद्र दराडे यांचे पुत्र कुणाल दराडे यांनी शिवसेनेचा केसाने गळा कापण्यात आला, असा संताप व्यक्त केला. ‘घरका भेदी लंका ढाएँ’ असे म्हत कुणाल दराडे यांनी मित्रपक्षांनीच घात केल्याचे सांगितले. “मित्रपक्षांवर आम्ही ज्या अपेक्षेने विश्वास ठेवला होता, तसे मतदान झाले नाही. शिवसेनेचा शंभर टक्के विश्वासघात झाला हा केवळ दराडे कुटूंबाचा विश्वासघात नाही तर, शिवसेनेचा विश्वासघात आहे. भाजपची २०० मते आणि शिवसेनेची१७० मते होती. उर्वरित मते महाविकास आघाडी व इतरांची होती. समोरच्या उमेदवाराची आकडेवारी पाहता महायुतीमध्ये दगाफटका झाल्याचे स्पष्ट दिसते. निवडणुकीच्या काळात, मी माघार घेतो, मी तुमच्याबरोबर आहे, आम्ही प्रचार करत नाही, असे सांगून दिशाभूल करण्याचे काम करण्यात आले. शेवटी केसाने गळा कापला गेला “, अशी टीका दराडे यांनी केली. “आता असे वाटायला लागले की समोरासमोर लढत झाली असती तर बरे झाले असते. नाशिक जिल्ह्यात या निवडणुकीच्या संदर्भात जे काही घडले, त्याची सविस्तर माहिती एकनाथ शिंदे यांना देणार आहे. इत्यंभूत अहवाल एकनाथ शिंदे यांना देणार आहे “, असेही कुणाल दराडे यांनी नमूद केले.