Rajabhau Waje : १०० कोटी अन् कर्जमुक्तीची ऑफर धुडकावली! ठाकरे गटाचे खासदार राजाभाऊ वाजे ‘नॉट फॉर सेल’

शिवसेना उद्धव बाळासाहेब ठाकरे पक्षाचे अनेक खासदार फुटण्याच्या मार्गावर असून त्यांच्याकडून लोकसभेत स्वतंत्र गट स्थापून शिवसेना शिंदे गटात सामील होण्याची तयारी झाल्याचे सांगण्यात येत आहे. ठाकरे गटाचे महाराष्ट्रात एकूण नऊ खासदार आहेत. त्यातील सहा खासदार शिंदे गटाच्या गळाला लागल्याचे बोलले जाते. या घटनाक्रमात नाशिकचे खासदार राजाभाऊ वाजे हे अपवाद ठरले. बुधवारी तेही रेल्वेने दिल्लीत पोहोचले. नवी दिल्लीतील खा. संजय राऊत यांच्या पत्रकार परिषदेत उपस्थित राहून त्यांनी आपण उद्धव ठाकरे यांच्यासोबत असल्याचा पुनरुच्चार केला. २०२४ च्या लोकसभा निवडणुकीत त्यांनी महायुतीच्या उमेदवाराचा मोठ्या मताधिक्याने पराभव केला होता. नाशिक शहरात भाजपचे वर्चस्व असताना लोकसभा मतदारसंघात शिवसेना शिंदे गटाला अर्थात महायुतीला ही जागा गमवावी लागली होती. यामुळे ‘ऑपरेशन टायगर’मध्ये नाशिकचे खासदार वाजे यांना सहभागी करण्यासाठी अतोनात प्रयत्न झाले. परंतु, ते बधले नाहीत. १४ एप्रिल रोजी शिवसेना शिंदे गटाचे देहू व ठाणे येथील दोन पदाधिकारी खा. वाजे यांच्या निवासस्थानी आले होते. खा. वाजे यांनी आपण काही निर्णय घेऊ शकत नाही, तुम्ही वडील प्रकाश वाजे यांच्याशी चर्चा करावी असे सांगून ते घराबाहेर पडले. म्हणजे संबंधितांशी खासदार वाजे यांची फारशी चर्चा झाली नाही.

आलेल्या व्यक्तींनी सुमारे दोन ते अडीच तास प्रकाश वाजे यांच्याशी चर्चा केल्याचे सांगितले जाते. यावेळी ३० कोटी आणि १०० कोटींची विकास कामे अशा ऑफर दिल्याचे बोलले जाते. खा. संजय राऊत यांनी समाजमाध्यमातून केलेले आरोप याच स्वरुपाचे आहेत. चर्चेदरम्यान उपमुख्यमंत्री एकनाथ शिंदे आणि खा. श्रीकांत शिंदे यांनी भ्रमणध्वनीवर संवाद साधल्याचे सांगितले जाते. राजाभाऊ यांचे कौतुक करीत तुम्ही त्याची जबाबदारी आमच्यावर सोपवा, पुढील २०२९ च्या निवडणुकीची काळजी करू नका, अशी साद घातली गेल्याची माहिती पुढे येत आहे. चर्चेत मागील निवडणुकीत झालेल्या कर्जाचा विषय निघाल्यावर राजाभाऊ वाजे यांना कर्जमुक्त करण्याची संपूर्ण तयारी करण्यात आल्याचे सांगितले जाते. खासदार राजाभाऊ वाजे यांच्या मन परिवर्तनासाठी दोन ते तीन वेळा अथक प्रयत्न करण्यात आले. परंतु, तुम्ही चुकीच्या माणसांकडे आल्याचे सांगून त्यांचे वडील प्रकाश वाजे यांनी या विषयावर पडदा टाकला. या घटनाक्रमाची माहिती नंतर पक्षप्रमुख उद्धव ठाकरे यांना दिली गेली. तेव्हाही प्रकाश वाजे यांनी ‘आम्ही कुठे जाणार नाही, आमची काळजी करू नका’, अशी ग्वाही दिल्याची माहिती पुढे आली आहे.