नाशिकमध्ये रस्त्यांचे डांबरीकरण कधी ? महिना आला समोर !

पालकमंत्री गिरीश महाजन यांनी नाशिकमधील रस्ते, पूल, पाणीपुरवठा आणि मलनिस्सारणाशी संबंधित विविध विकासकामांचा आढावा घेतला. घारपुरे घाट ते रामवाडी पुलाचे काम प्रलंबित राहू नये, यासाठी आवश्यक प्रशासकीय व तांत्रिक प्रक्रिया पूर्ण करून हे काम लवकरात लवकर सुरू करावे. पुलाच्या कामामुळे संबंधित परिसरातील वाहतूक व्यवस्था अधिक सुलभ होण्यास मदत होणार असल्याने कामाच्या प्रगतीवर नियमित लक्ष ठेवण्याच्या सूचना मंत्री महाजन यांनी दिल्या. तसेच तपोवन आणि आगरटाकळी येथील मलनिस्सारण प्रकल्पांच्या कामांना गती देण्याचे निर्देश त्यांनी दिले. या प्रकल्पांमुळे परिसरातील मलनिस्सारण व्यवस्था अधिक सक्षम होण्यास मदत होणार असून, नागरिकांना आवश्यक सुविधा वेळेत उपलब्ध करून देण्यासाठी संबंधित यंत्रणांनी समन्वयाने काम करावे.

पावसामुळे रस्त्यांवर निर्माण झालेले खड्डे प्राधान्याने बुजवून कामाची गुणवत्ता कायम ठेवावी. खड्डे बुजविण्याच्या कामात कोणताही विलंब होऊ नये, तसेच शहरातील प्रमुख रस्त्यांसह अंतर्गत रस्त्यांचीही पाहणी करून आवश्यक त्या ठिकाणी तातडीने दुरुस्ती करावी. नोव्हेंबरपासून डांबरीकरणासह रस्त्यांची इतर कामे सुरू करण्यात येणार असल्याचे मनपा प्रशासनाकडून सांगण्यात आले.

सिंहस्थ कुंभमेळ्याच्या पार्श्वभूमीवर नाशिकमधील वाहतूक व्यवस्था सक्षम करण्यासाठी महत्त्वाच्या रस्ते प्रकल्पांनाही प्राधान्य देण्यात येत आहे. द्वारका ते सिन्नर फाटा या मार्गासह शहरातील विविध प्रमुख रस्त्यांच्या कामांचा बैठकीत आढावा घेण्यात आला. पावसामुळे कामांमध्ये आलेला विलंब भरून काढण्यासाठी उपलब्ध कालावधीचा प्रभावी वापर करण्याच्या सूचना पालकमंत्र्यांनी दिल्या.

दरम्यान, गंगापूर रोडला समांतर रस्ता उभारण्याच्या प्रस्तावालाही गती देण्यात येणार आहे. या कामासाठी एक महिन्यात निविदा काढण्यात येणार असल्याची माहिती मनपा आयुक्त मनीषा खत्री यांनी दिली. सिंहस्थ कुंभमेळ्याच्या तयारीचा वेग वाढत असताना शहरातील रस्ते, वाहतूक आणि पायाभूत सुविधांची कामे वेळेत पूर्ण करण्याचे आव्हान प्रशासनासमोर आहे.

नाशिक त्र्यंबकेश्वर कुंभमेळा प्राधिकरणाच्या कार्यालयात आज सायंकाळी नाशिक महानगरपालिकेशी निगडित विविध कामांचा आढावा घेतला. त्यावेळी ते बोलत होते. यावेळी महापौर हिमगौरी आडके आहेर, आमदार प्रा. देवयानी फरांदे, स्थायी समिती सभापती मच्छिंद्र सानप, नाशिक-त्र्यंबकेश्वर सिंहस्थ कुंभमेळा प्राधिकरणाचे आयुक्त शेखर सिंह, मनपा आयुक्त मनीषा खत्री, जिल्हाधिकारी आयुष प्रसाद, अतिरिक्त आयुक्त अमित रंजन, उपायुक्त प्रदीप चौधरी, विवेक भदाणे, नियोजन उपायुक्त योगेंद्र चौधरी, शहर अभियंता संजय अग्रवाल यांच्यासह संबंधित अधिकारी उपस्थित होते.