नाशिक विधान परिषद निवडणूक २०२६: भाजपच्या ‘संकटमोचका’वर शिंदे गटाने कशी मात केली?

विधान परिषदेच्या १७ जागांसाठी उमेदवारी अर्ज भरण्याचा सोमवार हा शेवटचा दिवस आहे. तत्पुर्वी म्हणजे रविवारी रात्री भाजपने राज्यातील विधान परिषदेच्या १० आणि नागपूर पोट निवडणुकीतील एक अशी एकूण ११ उमेदवारांची यादी जाहीर केली. यामध्ये पक्षाला नाशिक ऐवजी छत्रपती संभाजीनगरची जागा मिळाल्याचे स्पष्ट झाले आहे. नागपूरमधील पोट निवडणूक वगळता उर्वरित १६ जागांवर महायुतीत प्रचंड रस्सीखेच सुरू होती. मुख्यमंत्री देवेंद्र फडणवीस यांनीही नाशिक आणि छत्रपती संभाजीनगर यापैकी एक जागा भाजप लढविणार असल्याचे म्हटले होते. नाशिकमध्ये भाजपचे संख्याबळ अधिक असल्याने ही जागा शिवसेना शिंदे गटाकडून काढून घेण्याची तयारी भाजपने केली होती. नाशिकच्या जागेच्या मोबदल्यात शिवसेना शिंदे गटाला एखाद्या महामंडळाचे उपाध्यक्षपद देण्याचा प्रस्ताव भाजपकडून मांडला गेला होता. दरम्यानच्या काळात कुंभमेळामंत्री गिरीश महाजन यांचे निकटवर्तीय गणेश गिते यांनी भाजपकडून आणि अपक्षही उमेदवारी अर्ज दाखल केले. त्यांचे सूचक व अनुमोदक सर्व भाजपची मंडळी होती. कोणत्याही परिस्थितीत मंत्री गिरीश महाजन हे नाशिकची जागा भाजपसाठी सोडवून आणतील, असा विश्वास गणेश गितेंसह भाजपच्या मंडळींना होता. परंतु, ही जागा शिवसेना शिंदे गटाकडे गेल्यामुळे त्यांच्या गोटात अस्वस्थता पसरली आहे.

वर्चस्वावरून चढाओढ

कुंभनगरी नाशिक जिल्ह्यातील वर्चस्वावरून महायुतीत सुरूवातीपासून मतभेद आहेत. त्यातून गिरीश महाजन यांना जाहीर झालेले पालकमंत्रीपद मिळू शकले नव्हते. कुंभमेळा नियोजनातून मंत्री महाजन यांनी नाशिक जिल्ह्यावर पुन्हा आपली पकड मजबूत केली. नाशिक महापालिकेत स्वबळावर एकहाती सत्ता प्राप्त केली. वरिष्ठांच्या निर्णयामुळे महापालिकेतील सत्तेत शिवसेना शिंदे गटाला इच्छा नसताना भाजपला वाटा द्यावा लागला. मंत्री महाजन यांच्या राजकीय डावपेचांमुळे पक्षाच्या स्थानिक लोकप्रतिनिधींची नाराजी प्रगट झालेली आहे. महाजन यांच्या वाढत्या प्रभावाने मित्रपक्षांची वेगळी स्थिती नाही. शिवसेना शिंदे गटाच्या शिवसंपर्क यात्रेत कुंभमेळा नियोजनातून मित्रपक्षांना बाजूला ठेवल्याची खदखद व्यक्त झाली होती.

गणेश गिते काय करणार?

नाशिकमध्ये मंत्री गिरीश महाजन यांचा प्रभाव पाहता विधान परिषदेची नाशिकची जागा शिंदे गटाला गमवावी लागणार असल्याची साशंकता व्यक्त झाली होती. तथापि, जागा वाटपाच्या वाटाघाटीत शिवसेना शिंदे गटाने भाजपवर मात करीत ही जागा आपल्याकडे राखण्यात यश मिळवले. विधान परिषदेच्या या जागेसाठी शिवसेना शिंदे गटाने माजी आमदार नरेंद्र दराडे यांनाच पुन्हा रिंगणात उतरवले आहे. नाशिकची जागा भाजपकडे खेचण्याचा प्रयत्न फोल ठरल्यानंतर अपक्ष म्हणून अर्ज दाखल करणारे गणेश गिते हे उमेदवारी कायम ठेवतात की माघार घेतात, याकडे सर्वांचे लक्ष आहे.