“अजित पवार यांनीच गटनेतेपदाचे आश्वासन दिले होते ” , डाॅ. हेमलता पाटील यांचा दावा…नाशिक राष्ट्रवादी काँग्रेसमध्ये चाललंय काय ?

नाशिक महापालिकेत भाजपकडे बहुमत असल्याने त्यांचा महापौर होणार हे एकिकडे निश्चित असताना भाजपचा मित्रपक्ष असलेला आणि महापालिका निवडणुकीत शिंदे गटाबरोबर एकत्र निवडणूक लढविलेल्या अजित पवार गटात मात्र वेगळेच रामायण सुरु आहे. गटनेतेपदाचा वाद उफाळून आला आहे. या वादातूनच सोमवारी झालेल्या गटनोंदणी प्रक्रियेला डॉ. हेमलता पाटील उपस्थित राहिल्या नाहीत. त्यांच्या अनुपस्थितीत राष्ट्रवादीच्या अजित पवार गटाने त सीमा ठाकरे यांची गटनेता म्हणून नोंद केली.

डाॅ. हेमलता पाटील यांच्या नाराजीमुळे आणि त्यांनी केलेल्या दाव्यांमुळे पक्षांतंर्गत वेगळाच संघर्ष उभा राहिला आहे. अजित पवार गटाचे एकूण चार नगरसेवक असून, डॉ. हेमलता पाटील वगळता उर्वरित सर्व नगरसेवक नवीन आहेत. त्यातच अपक्ष नगरसेवक मुकेश शहाणे यांनी अजित पवार गटाबरोबर नोंदणी केल्याने पक्षाचे महापालिकेतील संख्याबळ वाढले आहे.

डॉ. हेमलता पाटील यांनी काँग्रेसमध्ये अधिक वर्षे राजकारण केले. नंतर काँग्रेसमील गटबाजीला वैतागून त्यांनी शिवसेनेच्या शिंदे गटात प्रवेश केला होता. परंतु, त्या ठिकाणी त्या जास्त दिवस रमल्या नाहीत. शिंदे गटातून बाहेर पडल्यानंतर काही दिवस त्या शांत राहि्ल्या. महापालिका निवडणुकीच्या पार्श्वभूमीवर त्यांनी अजित पवार गटात प्रवेश केला.  निवडणुकीत त्या निवडूनही आल्या. महापालिकेत अजित पवार गटाचे गटनेतेपद आपल्यालाच मिळेल, अशी त्यांना आशा होती. २४ जानेवारी रोजी आपण उपमुख्यमंत्री अजित पवार यांची भेट घेतली होती, असे त्यांचे म्हणणे आहे. त्या भेटीत अजित पवार यांनी ज्येष्ठत्वाच्या आधारावर तुम्हालाच गटनेता म्हणून काम करावे लागेल, असे  सांगितले होते, असे डाॅ. हेमलता पाटील यांचे म्हणणे आहे.

अजित पवार यांच्या अपघाती मृत्युनंतर प्रदेशाध्यक्ष सुनील तटकरे यांच्या स्वाक्षरीचे पत्र सीमा ठाकरे यांच्या नावाने आल्याने संभ्रम निर्माण झाला आहे. जोपर्यंत या प्रकरणावर प्रदेशाध्यक्षांकडून अधिकृत स्पष्टीकरण केले जात नाही, तोपर्यंत आपण कोणत्याही गटात सहभागी होणार नसल्याची भूमिका त्यांनी घेतली आहे. प्रदेशाध्यक्ष तटकरे यांच्याशी फोनवर झालेल्या चर्चेत त्यांनी असे कोणतेही पत्र दिले नसल्याचे सांगितल्याचा दावाही पाटील यांनी केला आहे.

अजितदादा पवार यांच्या कार्यालयातून अशा प्रकारची पत्रे कधीही जात नव्हती. कोणत्याही दबावाला बळी न पडता लोकांसाठी काम करत राहणार, असे डाॅ. हेमलता पाटील यांनी म्हटले आहे, दुसरीकडे, वैयक्तिक कारणांमुळे डॉ. हेमलता पाटील गटनोंदणीला उपस्थित राहू शकल्या नाहीत. त्यांना केव्हाही गटात सहभागी होता येईल,’ असे राष्ट्रवादीचे शहराध्यक्ष रंजन ठाकरे यांनी नमूद केले आहे. गटनेतेपदावरुन उदभवलेल्या वादाने अजित पवार गटातील संघर्ष कोणत्या टोकाला गेला आहे, ते स्पष्ट होत आहे.