“शेतकरी संकटात असताना कुठे गेले संकटमोचक गिरीश महाजन…?”, जळगावमध्ये संजय राऊतांचा घणाघात

राज्यात पुढील तीन वर्षांच्या कालावधीत कोणत्याही मोठ्या निवडणुका नसल्या, तरी पहिली निवडणूक लोकसभेची होणार आहे. त्यामुळे लोकसभेच्या आगामी निवडणुकांच्या पार्श्वभूमीवर संभाव्य उमेदवाराची निवड आतापासून करून त्यांना कामाला लावणे गरजेचे असल्याचे खासदार संजय राऊत यांनी स्पष्ट केले. शुक्रवारी जळगाव दौऱ्यावर आल्यानंतर खासदार राऊत यांनी पक्ष संघटनेचा आढावा घेतला. तत्पूर्वी त्यांनी पत्रकारांशी संवाद साधला.

राज्यातील प्रश्न झपाट्याने बदलत असताना सत्ताधारी त्याकडे गांभीर्याने पाहत नाहीत. अवकाळी पावसामुळे जळगावमधील शेतकरी हतबल झाला आहे; मात्र पालकमंत्री, आमदार किंवा खासदारांनी त्यांच्या बाबतीत कोणतीही संवेदना व्यक्त केलेली नाही. शासनाकडे मदत मिळावी यासाठीही कोणी पुढाकार घेतलेला दिसत नाही. हे सरकार पूर्णपणे असंवेदनशील असून, जळगावमधील मंत्र्यांनाही शेतकऱ्यांच्या प्रश्नांचे गांभीर्य उरलेले नाही, अशी टीका राऊत यांनी केली.

मंत्री गिरीश महाजन यांच्यावर निशाणा साधत राऊत म्हणाले की, “संकटमोचक” म्हणून ओळख असलेले भाजप नेते गिरीश महाजन संकटाच्या वेळी कुठे दिसत नाहीत. जनतेवर संकट येते तेव्हा ते अनुपस्थित राहतात, मात्र राजकीय डावपेचांमध्ये ते व्यस्त असतात. आमदार पळवणे, नगरसेवक फोडणे आणि पक्षांतर्गत राजकारण करणे हेच त्यांचे काम झाले आहे, असा आरोप त्यांनी केला.

जळगाव जिल्ह्यात सध्या राजकीय हुकुमशाही सुरू असल्याचाही गंभीर आरोप राऊत यांनी केला. पोलिसांचा वापर करून विरोधकांवर दबाव टाकला जात असून “वर्दीतले गुंड” तयार होत असल्याची टीकाही त्यांनी केली. ही परिस्थिती लोकशाहीसाठी धोकादायक असल्याचे त्यांनी नमूद केले. जिल्ह्यातील काही भागांत सत्ताधाऱ्यांच्या दबावाखाली पोलीस प्रशासन काम करत असल्याचेही त्यांनी सूचित केले.

दरम्यान, राहुरी आणि बारामती येथे होणाऱ्या पोटनिवडणुकांबाबतही त्यांनी भूमिका स्पष्ट केली. महाविकास आघाडीच्या धोरणानुसार ज्या पक्षाची ज्या भागात ताकद आहे, त्या पक्षानेच निवडणूक लढवावी, असे त्यांनी सांगितले. राहुरी येथे राष्ट्रवादी काँग्रेस (शरद पवार गट) नेते प्राजक्त तनपुरे यांना पाठिंबा देण्यासाठी आघाडीतील तिन्ही पक्षांनी एकत्र येऊन निर्णय घ्यावा, असे मत त्यांनी व्यक्त केले. बारामतीबाबत बोलताना त्यांनी सांगितले की, तेथे परिस्थितीनुसार निर्णय घेतला जाईल. एखाद्या घटक पक्षाने निवडणूक लढवली, तर इतरांनी त्याला विरोध करू नये, अशी भूमिका त्यांनी मांडली. एकूणच, जळगाव दौऱ्यात संजय राऊत यांनी सत्ताधाऱ्यांवर तीव्र टीका करत आगामी निवडणुकांच्या पार्श्वभूमीवर महाविकास आघाडीची रणनीती स्पष्ट केली. त्यांच्या वक्तव्यामुळे जिल्ह्यातील राजकीय वातावरण तापण्याची शक्यता व्यक्त केली जात आहे.