प्रशासकीय सुधारणेत शबरी महामंडळाची उच्च कामगिरी, ‘सेवाकर्मी प्लस’ अभियानात राज्यात प्रथम

शबरी महामंडळाने केवळ प्रशासकीय कामातच नव्हे, तर आदिवासी बांधवांच्या उत्पादनांना बाजारपेठ मिळवून देण्यासाठी ‘शबरी नॅचरल्स’ या ब्रँडच्या माध्यमातून उल्लेखनीय कार्य केले आहे. प्रशासकीय स्तरावर मिळालेल्या या प्रथम क्रमांकाच्या यशामुळे ‘शबरी नॅचरल्स’ ब्रँडची विश्वासार्हता आणि कार्यक्षमता अधिक वृद्धिंगत होणार आहे. भविष्यात या ब्रँडच्या माध्यमातून आदिवासी विकास आणि विपणन व्यवस्था अधिक बळकट करण्यावर महामंडळाचा भर राहणार आहे. भारतीय गुणवत्ता परिषदेने केलेल्या या मूल्यमापनात महामंडळाने १०० पैकी ८४ गुण मिळवले. यामध्ये प्रामुख्याने खालील ९ घटकांचा विचार करण्यात आला होता. आकृतीबंध व सेवाप्रवेश नियम अद्ययावत करणे, ज्येष्ठता सूची, पदोन्नती आणि बिंदूनामावलीची अचूकता, कर्मचाऱ्यांचे प्रशिक्षण आणि सेवा पुस्तके अद्ययावत करणे यांचा समावेश होता.

मुख्यमंत्री कार्यालयामार्फत प्रजासत्ताक दिनाचे औचित्य साधून या निकालांची घोषणा करण्यात आली. महामंडळाच्या व्यवस्थापकीय संचालक लीना बनसोड आणि त्यांच्या संपूर्ण पथक या यशाबद्दल सर्व स्तरांतून कौतुक होत आहे. उत्कृष्ट कामगिरी करणाऱ्या या सर्व विजेत्यांचा राज्य शासनातर्फे लवकरच विशेष सन्मान करण्यात येणार आहे.

या पुरस्कारामुळे आदिवासी विकास विभागांतर्गत कार्यरत असलेल्या शबरी महामंडळाच्या कामाला नवी ऊर्जा मिळाली असून, ‘शबरी नॅचरल्स’च्या माध्यमातून आदिवासी उत्पादने जागतिक स्तरावर नेण्यासाठी प्रशासन सज्ज झाले आहे. तसेच आदिवासी बांधवांचे जीवनमान उंचावण्यासाठी शबरी आदिवासी वित्त व विकास महामंडळ कटिबद्ध असल्याच्या भावना व्यवस्थापकीय संचालक लीना बनसोड यांनी व्यक्त केली.