नवी मुंबई पालिका-‘निसर्गप्रेमी’ संस्थेचा उपक्रम नवी मुंबई महानगरपालिका आणि सानपाडा येथील ‘निसर्गप्रेमी फांऊडेशन’ यांच्या वतीने जुईनगर रेल्वे स्थानकाजवळील पडिक जमिनीवर वृक्षारोपण केले, अर्थात या रोपांच्या वाढीसाठी लागणारे खतही तयार करण्यात आले आहे. प्रत्येक घरातील सुका आणि ओला कचरा वेगळा करून त्यावर प्रक्रियेद्वारे खत तयार करण्यात येत आहे. यात निर्माल्याचा मोठा वाटा आहे. गांडूळ शेती आणि त्यापासून जैविक खत आणि पालापाचोळ्यापासून नैसर्गिक कोळसा तयार करण्याचा प्रकल्प सुरू करण्यात आला आहे. या प्रकल्पाचा लोकार्पण सोहळा नवी मुंबई पालिकेचे महापौर सुधाकर सोनवणे यांच्या हस्ते नुकताच झाला. गेली आठ वर्षे निसर्गप्रेमी संस्था रोप संवर्धन; तसेच पर्यावरणपूरक विविध उपक्रम राबवीत आहे. कचरा हा घातक न ठरवता तो उपयोगी ठरवण्याच्या पालिकेच्या आणि निसर्गप्रेमी संस्थेच्या उपक्रमाला नागरिकांनी प्रतिसाद दिला तर भविष्यात कचरा ही समस्या उरणार नाही, असा आशावाद महापौरांनी या वेळी व्यक्त केला.
