सध्या देशात आणि राज्यात करोनाचा प्रादुर्भाव मोठ्या प्रमाणात वाढत आहे. दरम्यान, नवी मुंबईत करोनाबाधितांच्या संख्येत दररोज मोठी वाढ होत असून मृतांच्याही संख्येत दररोज वाढ होताना दिसत आहे. वाढत्या संसर्गामुळे शहरात शुक्रवारी ३०८ नवे रुग्ण वाढले असून शहरात करोनाबाधितांची एकूण संख्या १२ हजार ९०७ झाली आहे. दरम्यान, शहरात आज ५ जणांचा करोनामुळे मृत्यू झाला असून करोनामुळे मृत पावलेल्यांची एकूण संख्या ३७० वर पोहोचली आहे. शहरात आतापर्यत तब्बल ८ हजार ३५७ रुग्ण करोनामुक्त झाले आहेत. तर शहरात ४ हजार १८० रुग्णांवर उपचार सुरू आहेत. शहरात प्रतिजन चाचण्या करण्यात येत आहेत. शहरातील करोना प्रादुर्भाव रोखण्याचे मोठे आव्हान पालिकेसमोर असून पालिकेने मिशन ब्रेक द चेन मोहिम सुरू केली आहे. तर पालिका आयुक्त अभिजीत बांगर यांनी आज वाशी येथील करोना रुग्णालयाला भेट दिली.
