बोईंग ७४७’ मालवाहू विमानाचे नवी मुंबईत आगमन

नवी मुंबई आंतरराष्ट्रीय विमानतळावर यापूर्वी इंडिगो कार्गोचे एअरबस ए३२१ मालवाहू विमान, हाँगकाँग एअर कार्गोचे एअरबस ए३३०-२०० एफ आणि अफकॉम कार्गोचे बोईंग ७३७-८०० एफ ही मालवाहू विमाने दाखल झाली आहेत. त्यानंतर बोईंग ७४७च्या आगमनामुळे विमानतळावर हाताळण्यात आलेल्या मोठ्या मालवाहू विमानांच्या प्रकारात आणखी एका विमानाची भर पडली आहे.

नवी मुंबई आंतरराष्ट्रीय विमानतळावरील मालवाहतूक सेवेत गेल्या काही आठवड्यांत वाढ झाली आहे. विविध आंतरराष्ट्रीय मार्गांवरून मालवाहू विमानांची ये-जा सुरू झाल्याने विमानतळाच्या कार्गो सेवेला चालना मिळत आहे. या पार्श्वभूमीवर बोईंग ७४७सारख्या मोठ्या मालवाहू विमानाचे आगमन महत्त्वाचे मानले जात आहे. विमानतळाच्या आंतरराष्ट्रीय मालवाहतूक सेवेत मोठ्या क्षमतेची विमाने हाताळण्याची क्षमता असल्याचेही या आगमनातून स्पष्ट झाले आहे.