लोकसत्ता प्रतिनिधी
उरण : विधानसभेच्या निवडणुकीचे अर्ज मागे घेण्याची मुदत सोमवारी दुपारी संपली आणि उरणच्या महाविकास आघाडीत बिघाडी झाल्याचे स्पष्ट झाले. यामुळे मतविभाजन होऊन विद्यामान आ. महेश बालदी या भाजप उमेदवाराला याचा फायदा होणार आहे. त्यामुळे भाजपला जे हवे होते, तसेच घडल्याने भाजप कार्यकत्र्यांमध्ये उत्साह निर्माण झाला आहे.
या मतदारसंघातील मतदारांना महायुती आणि महाविकास आघाडी अशी लढत अपेक्षित होती. कारण लोकसभा निवडणुकीत मतदारांनी महाविकास आघाडीला मताधिक्य दिले होते. मात्र शिवसेना ठाकरे गट आणि शेतकरी कामगार पक्ष यांच्यातील मतभेदांमुळे महाविकास आघाडीचे प्रमुख घटक पक्ष असलेल्या या दोन्ही पक्षांच्या उमेदवारांनी आपले अर्ज कायम ठेवल्याने महाविकास आघाडीत पक्षाचे कार्यकर्ते संभ्रमात आहेत. तर उरण विधानसभा मतदारसंघातील उमेदवारांनी आपापल्या प्रचाराला सुरुवात केली आहे. प्रचारासाठी वॉर रूम सज्ज झाल्या आहेत. यातून समाजमाध्यमाद्वारे प्रचार सुरू झाला आहे. तर उरणमध्ये महाविकास आघाडीतील रस्सीखेचीमुळे ही निवडणूक तिरंगी झाली आहे.
आणखी वाचा-निवडणुकीनंतर विमानतळ नामकरण आंदोलन तीव्र, नामकरण समितीचे अध्यक्ष दशरथ पाटील यांची माहिती
सध्या उरण विधानसभा निवडणुकीसाठी भाजप, शिवसेना ठाकरे गट व शेतकरी कामगार पक्ष या तीन प्रमुख पक्षांनी प्रचार सुरू केला आहे. या वॉर रूममधून इच्छुक उमेदवार आणि त्यांचे कार्यकर्ते एकमेकांना आरोप प्रत्यारोप करू लागले आहेत. काहींनी तर मतदान केंद्रनिहाय आपली तयारीही पूर्ण केली आहे. त्यासाठी कार्यकत्र्यांनी कंबर कसली आहे. उरण विधानसभा निवडणुकीत विद्यामान आ. महेश बालदी हे भाजपकडून, माजी आ. मनोहर भोईर शिवसेना ठाकरे गटाकडून तर प्रीतम म्हात्रे यांनी शेतकरी कामगार पक्षाकडून प्रचाराला सुरुवात केली आहे.
मतांचे विभाजन
उरण विधानसभा मतदारसंघात शिवसेना ठाकरे गट व शेतकरी कामगार पक्ष यांच्यात एकमत न झाल्याने महाविकास आघाडीत बिघाडी झाली आहे. हे दोन्ही पक्ष या मतदारसंघात वेगवेगळे लढणार आहेत. त्यामुळे महाविकास आघाडीची मते विभागली जाणार आहेत. याचा फायदा महायुतीचे उमेदवार असलेल्या भाजपला होणार आहे.
