Navi Mumbai Airport : नवी मुंबईचे आकाशस्वप्न पूर्ण होताना… पहिल्या उड्डाणाचे साक्षीदार होण्यासाठी प्रवाशांचा उत्साह

नवी मुंबई आंतरराष्ट्रीय विमानतळाची संकल्पना मांडली गेल्यापासून प्रत्यक्ष उड्डाणापर्यंतचा सुमारे २५ वर्षांचा प्रवास आज पूर्णत्वास गेला, याचे समाधान अनेकांच्या चेहऱ्यावर स्पष्ट दिसत होते. खास प्रकल्पग्रस्तांना यासाठी आमंत्रित करण्यात आले. त्यांच्या जमीन त्यागावर हे विमानतळ उभे राहील्याची भावना यावेळी त्यांच्या चेह-यावर स्पष्ट दिसत होती. या पार्श्वभूमीवर जासई गावातील प्रकल्पग्रस्तांनी विमानतळाला दि. बा. पाटील यांचे नाव देण्याची मागणी करत काही क्षणासाठी येथे घोषणाबाजी सुद्धा केली.

कोणताही अनुचित प्रकार घडू नये म्हणून सहाय्यक पोलीस आयुक्त मयूर भुजबळ यांच्या मार्गदर्शनाखाली बंदोबस्त तैनात करण्यात आला. समजूत काढल्यानंतर प्रकल्पग्रस्तांपैकी प्रवाशांना विमानतळ परिसरात प्रवेश देण्यात आला.दरम्यान, अदानी उद्योग समूहाचे प्रमुख गौतम अदानी यांनी सकाळी विमानतळाला भेट दिली. सकाळी आठ वाजता बंगळुरूहून आलेले ६ ई ४६० विमान धावपट्टीवर उतरले असता जलतोफांच्या सलामीने त्याचे स्वागत करण्यात आले. हा क्षण अत्यंत भावूक आणि आनंददायी असल्याची प्रतिक्रिया प्रवाशांनी व्यक्त केली. त्यानंतर सकाळी ८.४० वाजता ६ ई ८८२ हे विमान हैदराबादसाठी रवाना झाले.

पहिल्या प्रवासाचा अनुभव घेण्यासाठी अनेकांनी परतीची तिकिटेही काढली होती. कळंबोलीतील सुधागड एज्युकेशन संस्थेचे प्राचार्य राजेंद्र पालवे हे याच प्रवाशांपैकी एक आहेत. प्राचार्य पालवे यांनी हा क्षण नवी मुंबई आणि पनवेलकरांसाठी अविस्मरणीय असल्याचे सांगितले. देशाच्या हवाई नकाशावर नवी मुंबईचे नाव ठळकपणे कोरले जात असून यामुळे शहराच्या प्रगतीला नवी गती मिळेल, असे त्यांनी नमूद केले.

विशेष म्हणजे अदानी फाऊंडेशन तर्फे प्रकल्पग्रस्त कुटुंबे, खास बालके आणि स्वयंरोजगारासाठी कौशल्य प्रशिक्षण घेतलेल्या अशा ७० जणांसाठी विशेष उड्डाणाची व्यवस्था करण्यात आली. ४५ मिनिटांच्या हवाई फेरीतून पुन्हा धावपट्टीवर उतरणाऱ्या या विमानामुळे अनेकांना पहिल्यांदाच आकाशात झेप घेण्याचा अनुभव मिळणार आहे. कधीच विमानप्रवास न केलेल्यांना हा अनुभव देण्यासाठी हे नियोजन केल्याची माहिती फाउंडेशनच्या सुवर्णा शेटे यांनी दिली.