वन मंत्री गणेश नाईकांना उपमुख्यमंत्री एकनाथ शिंदे यांचे पुन्हा आव्हान; नवी मुंबईत महापौर-उपमहापौर पदासाठी शिंदेंचे शिलेदार रिंगणात

नवी मुंबई महापालिका निवडणुकीत एकमेकांवर झालेल्या आरोप-प्रत्यारोपांनंतर वनमंत्री गणेश नाईक आणि उपमुख्यमंत्री एकनाथ शिंदे यांच्यातील वाद मिटल्याचे म्हटले जात असताना महापौर पदावरून दोन्ही नेत्यांमधील संघर्ष पुन्हा एकदा पेटल्याचे चित्र आहे.

वन मंत्री गणेश नाईकांना उपमुख्यमंत्री एकनाथ शिंदे यांचे पुन्हा आव्हान (प्रतिकात्मक छायाचित्र)

नवी मुंबई : नवी मुंबई महापालिका निवडणुकीत एकमेकांवर झालेल्या आरोप-प्रत्यारोपांनंतर वनमंत्री गणेश नाईक आणि उपमुख्यमंत्री एकनाथ शिंदे यांच्यातील वाद मिटल्याचे म्हटले जात असताना महापौर पदावरून दोन्ही नेत्यांमधील संघर्ष पुन्हा एकदा पेटल्याचे चित्र आहे. बहुमताच्या जोरावर नवी मुंबईत भाजपचा महापौर होणार हे स्पष्ट झाले असतानाही उपमुख्यमंत्री एकनाथ शिंदे यांच्या नेतृत्वाखालील शिवसेनेने महापौर आणि उपमहापौर पदांसाठी थेट उमेदवार रिंगणात उतरवत वनमंत्री गणेश नाईक यांच्या वर्चस्वाला आव्हान दिले आहे.

नवी मुंबईत महापालिका निवडणूक स्वबळावर लढवत बहुमताचा आकडा सहज पार करून वनमंत्री गणेश नाईक यांनी आपले राजकीय वर्चस्व पुन्हा एकदा सिद्ध केले आहे. महापालिकेतील निर्णयप्रक्रिया, विकासकामांचे नियंत्रण आणि स्थानिक नेतृत्वावर त्यांचा प्रभाव दिसून आला. मात्र, सध्याच्या राजकीय स्थितीत शिंदे गटाने या वर्चस्वाला थेट आव्हान देण्याचा निर्धार केला आहे. नवी मुंबईत शिवसेनेचे महापौर-उपमहापौर पदांच्या निवडणुकीत केवळ प्रतीकात्मक लढत न ठेवता प्रत्यक्ष सत्ता समीकरण बदलण्याचा प्रयत्न सुरू असल्याचे संकेत मिळत आहेत.

नवी मुंबई महापालिकेत एकूण १११ नगरसेवक असून भाजपचे ६५ नगरसेवक निवडून आले आहेत. एका अपक्ष नगरसेवकाच्या पाठिंब्यामुळे भाजपची संख्या ६६ वर पोहोचली आहे. शिवसेना (एकनाथ शिंदे) कडे ४२ नगरसेवक आहेत, तर शिवसेना (उद्धव बाळासाहेब ठाकरे) गटाचे दोन आणि मनसेचा एक नगरसेवक आहे. बहुमतासाठी ५६ नगरसेवकांची आवश्यकता असताना भाजपने हा आकडा सहज पार केला आहे.

हेही वाचा

नवी मुंबईत गणेश नाईकांचे धक्कातंत्र…निष्ठावान नेत्याच्या पत्नीला केले महापौर

महापौरपद महिलांसाठी राखीव असल्याने शिवसेना (शिंदे) गटाकडून सरोज पाटील यांनी महापौरपदासाठी, तर आकाश मडवी यांनी उपमहापौरपदासाठी अर्ज दाखल केला आहे. “नवी मुंबईच्या विकासासाठी पर्यायी नेतृत्व आवश्यक आहे,” असा सूर या गटाकडून व्यक्त केला जात असून, ही लढत केवळ औपचारिक न ठेवता प्रत्यक्ष राजकीय ताकद दाखवण्याचा प्रयत्न असल्याचे बोलले जात आहे.

दुसरीकडे भाजपकडूनही उमेदवारी अर्ज दाखल करण्यात आले आहेत. भाजपचे गटनेते सागर नाईक यांच्या उपस्थितीत सुजाता पाटील यांनी महापौरपदासाठी, तर दशरथ भगत यांनी उपमहापौरपदासाठी अर्ज सादर केला आहे. महापालिकेतील संख्याबळ, प्रशासनातील अनुभव आणि विकासकामांचा आलेख याच्या जोरावर भाजपचा आत्मविश्वास कायम आहे.

या पार्श्वभूमीवर महापौर आणि उपमहापौर पदांची निवडणूक आता प्रतिष्ठेची लढाई ठरण्याची चिन्हे स्पष्ट झाली आहेत. ५ फेब्रुवारी रोजी होणाऱ्या विशेष सर्वसाधारण सभेत या निवडणुकीचा निकाल लागणार असून, नवी मुंबईतील राजकीय समीकरणांमध्ये यामुळे नेमका कोणता संदेश जाणार, याकडे सर्वांचे लक्ष लागले आहे.