हेल्मेटमधून उघडकीस आली हायड्रो गांजा तस्करी

गुरुवारी सायंकाळी साडेसातच्या सुमारास पनवेल शहरातील डॉ. बाबासाहेब आंबेडकर पुतळ्यासमोरील चौकात वाहतूक पोलिसांकडून वाहन तपासणी सुरू होती. यावेळी एका संशयित दुचाकीस्वाराच्या डोक्यावर हेल्मेट नव्हते तसेच दुचाकीची नंबरप्लेट अस्पष्ट असल्याचे आढळले. पोलिसांनी विचारणा केल्यानंतर संबंधित तरुणाने हेल्मेट दुचाकीच्या डिकीमध्ये असल्याचे सांगत कारवाई न करण्याची विनंती केली. एकदा संधी देण्याच्या भूमिकेतून पोलिसांनी डिकी उघडली असता त्यातून उग्र वास आल्याने संशय बळावला.

तातडीने पनवेल शहर पोलिसांचे बीट मार्शल घटनास्थळी दाखल झाले. चौकशीत दुचाकी तरुणाची नसून त्याच्या मित्राकडून त्याने घेतल्याचे समजल्यावर कागदपत्रांवरील मालकाला पोलिस ठाण्यात बोलावून घेण्यात आले. त्यानंतर खरा प्रकार उघडीस आला. या दुचाकीच्या डिकीमध्ये २९ ग्रॅम वजनाचा हायड्रो गांजा लहान पिशव्यांमध्ये विक्रीसाठी ठेवलेला आढळून आला. तसेच १ ते ५०० ग्रॅम वजनासाठीचा लहान वजनकाटा सापडला.

अधिक चौकशीत हा गांजा स्नॅपचॅटवरून खरेदी केल्याची कबुली तरुणाने दिल्याने पोलिसही चक्रावले. अत्याधुनिक साधनांसाठी ओळखल्या जाणाऱ्या नवी मुंबई पोलीस दलासमोर गुन्हेगारांनीही तितक्याच आधुनिक पद्धतीने पावले टाकल्याचे स्पष्ट झाले आहे.

या प्रकरणी पनवेल शहर पोलिस ठाण्यात गुन्हा दाखल करण्यात आला असून दुचाकी, हायड्रो गांजा, वजनकाटा आणि आयफोन असा सुमारे दीड लाख रुपयांचा मुद्देमाल जप्त करण्यात आला आहे. पनवेल परिसरात तरुणांमध्ये वाढत चाललेल्या अमलीपदार्थांच्या विक्रीचा स्रोत आणि जाळे शोधण्यासाठी पोलिसांकडून पुढील तपास सुरू आहे.