खारघर येथील पांडवकड्यात दोन जण गेले वाहून; धबधब्यांचे आकर्षण घातक

शुक्रवारी सायंकाळी तळोजा येथे राहणारा २० वर्षीय मोहम्मद मोबशीर मोहम्मद शाहिद याचा खारघर परिसरातील पाण्यात बुडून मृत्यू झाला. त्यानंतर शनिवारी सकाळी मुंबईतील सांताक्रुझ येथील १९ वर्षीय शेण्णोन गॅस्पर किनी याचाही अशाच प्रकारे मृत्यू झाला. दोन्ही घटनांनंतर अग्निशमन दलाचे जवान तातडीने घटनास्थळी दाखल झाले. संबंधित तरुणांना वाचविण्याचे प्रयत्न करण्यात आले; मात्र त्यात यश आले नाही.

खारघर परिसरातील डोंगररांगांमधून वाहणारे पावसाळी धबधबे आणि नैसर्गिक जलसाठे पावसाळ्यात मोठ्या प्रमाणावर पर्यटकांना आकर्षित करतात. मात्र या ठिकाणी पाण्याचा खोलीचा अंदाज न येणे, वेगवान प्रवाह आणि सुरक्षेच्या नियमांकडे दुर्लक्ष केल्यामुळे वारंवार अपघात घडत असल्याचे दिसून येत आहे.

गेल्या दहा वर्षांत खारघर परिसरात पाण्यात बुडून मृत्यू झालेल्यांची संख्या १६ वर पोहोचली आहे. यापूर्वी मंगळवारी खारघर येथील भारती विद्यापीठ महाविद्यालयाच्या मागील खदाणीत मुंबईहून पोहण्यासाठी आलेल्या १६ वर्षीय विद्यार्थ्याचाही बुडून मृत्यू झाला होता.

सलग घडणाऱ्या या घटनांमुळे पावसाळ्यात धबधबे आणि जलसाठ्यांच्या परिसरात सुरक्षेच्या उपाययोजना अधिक प्रभावीपणे राबविण्याची मागणी नागरिकांकडून होत आहे. तसेच धोकादायक ठिकाणी जाणे टाळावे आणि प्रशासनाच्या सूचनांचे पालन करावे, असे आवाहन प्रशासनाकडून करण्यात येत आहे.