नवी मुंबई : सिडको महामंडळाच्या परिवहन विभागाने नियोजित केलेल्या खारघर ते तूर्भे या लिंकरोडचे काम नूकतेच खारघर येथून सूरु केले परंतू ज्या ठिकाणी काम सूरु झाले त्या लगतच्या सेक्टर ३५ येथील मोकळ्या मैदानावर १४ नोव्हेंबरला पंतप्रधान नरेंद्र मोदी यांची प्रचारसभा होणार असल्याने हे काम थांबविण्यात आले आहे. ही प्रचारसभा झाल्यानंतरच हे काम सूरु होईल असे नाव न सांगीतले जात आहे. नवी मुंबई आंतरराष्ट्रीय विमानतळामुळे खारघर, उलवे, द्रोणागिरी, नवी मुंबईतील विविध उपनगरांतील दळणवळणाचे जाळे आणखी मजबूत करण्याचे सिडको मंडळाचे नियोजन आहे.खारघर तूर्भे लिंकरोड हा याच दळणवळणातील एक मुख्य प्रकल्प आहे.
हेही वाचा >>> उरण : द्रोणागिरी, पुष्पकनगरमध्ये अनधिकृत वाहनतळ, ढाबे
सिडकोचे सह व्यवस्थापकीय संचालक दिलीप ढोले यांच्या नेतृत्वाखाली या प्रकल्पाचे काम सूरु आहे. या प्रकल्पाला वन आणि पर्यावरण विभागाच्या सर्व परवानग्या मिळाल्याने हे काम सिडको मंडळाने सूरु करण्याचे आदेश संबंधित ठेकेदार कंपनीला दिले आहेत. या प्रकल्पामुळे अवघ्या काही मिनिटांत तळोजा औद्योगिक वसाहतीमधील आणि पनवेलच्या इतर वाहनांना थेट तूर्भे मार्गे नवी मुंबईतील वाशी, तुर्भे, जुईनगर, नेरूळ, एपीएमसी मार्केट, टीटीसी औद्योगिक वसाहत येथे जाता येणार आहे. ५.४९ किलोमीटर लांबीचा हा प्रकल्प आहे. तुर्भे ते खारघरदरम्यान पारसिक डोंगराखालील १.७६ किमीच्या बोगदा खणने तसेच उड्डाणपुल बांधणे ही मुख्य दोन कामे या प्रकल्पात आहेत.
हेही वाचा >>> बेलापूरच्या प्रचारात राम, कृष्ण, गजाननाचा गजर !
सध्या मुंबईहून खारघर उपनगरात येणा-या वाहनचालकांना शीव पनवेल महामार्ग तसेच पामबीच मार्गेच यावे लागते. हा मार्ग झाल्यानंतर तूर्भे येथून थेट खारघर आणि अप्पर खारघरमध्ये काही मिनिटात पोहचता येईल. खारघर उपनगरातील हा मार्ग बनण्यासाठी तीन वर्षांचा काळ लागणार आहे. जेथे हा मार्ग खारघरमधून सूरु होतो तेथील सेक्टर ३५ येथे उन्नत मार्ग उभारुन सिडको मंडळाने सूमारे शंभर एकर जागेवर इंटरनॅशनल कॉर्पोरेट पार्क उभारणाराला हा मार्ग जोडणार आहे. त्यामुळे या कार्पोरेट पार्कमधून थेट तूर्भे मार्गे मुंबईकडे काही मिनिटांत जाता येईल. सध्या शीव पनवेल महामार्गावरुन खारघर उपनगरात येजा करण्यासाठी वाहतूक कोंडीचा सामना करावा लागतो. खारघर तूर्भे लिंकरोड मार्ग वाहतूकीसाठी खुला झाल्यावर शीव पनवेल महामार्गावरील वाहतूक कोंडी कमी होईल. सिडको मंडळ या प्रकल्पासाठी सूमारे तीन हजार कोटी रुपये खर्च करणार आहे.
