महाशिवरात्री साधेपणाने

नवी मुंबई : बुधवारी नवी मुंबईत १५३ तर पनवेलमध्ये १३२ दैनंदिन करोना रुग्ण सापडल्याने प्रशासनाची चिंता वाढली आहे. त्यामुळे गुरुवारच्या महाशिवरात्रीच्या उत्सवावर या दोन्ही महापालिकांनी काही र्निबध घातले आहेत. हा उत्सव साधेपणाने साजरा करण्याचे आदेश दिले असून गर्दी झाल्यास मंदिर व्यवस्थापनावर फौजदारी कारवाईचा इशारा दिला आहे.

राज्य शासनानेही महाशिवरात्र उत्सव अत्यंत साधेपणाने साजरा करण्याचे आवाहन केले आहे. त्यानुसार नवी मुंबई महापालिका प्रशासनानेही नागरिकांनी सामाजिक अंतराचे भान ठेवावे. मंदिर व्यवस्थापनाने मंदिरात गर्दी होणार नाही याची खबरदारी घ्यावी. तसेच सामाजिक अंतराचे भान ठेवावे असे आवाहन केले आहे, तर मंदिर व्यवस्थापनाने योग्य ती खबरदारी न घेतल्यास नियमानुसार योग्य ती कारवाई करण्यात येणार असल्याची माहिती पालिका प्रशासनाने दिली.

नवी मुंबई शहरात बेलापूर, दारावे गाव, नेरुळ, पावणे, वाशी येथील शिवमंदिरात दरवर्षी दर्शनासाठी भाविकांची गर्दी होत असते. या ठिकाणी पालिका प्रशासन दक्षता पथकांद्वारे लक्ष ठेवणार आहे. नागरिकांनी घरीच पूजा करावी. मंदिरात एकावेळी फक्त ५० भाविकांनाच प्रवेश द्यावा, मंदिराच्या परिसरात प्रतिबंधात्मक उपाययोजना कराव्यात, मुखपट्टी अनिवार्य करावी व र्निजतुकीकरणाची व्यवस्था करावी असे आवाहन करण्यात आले आहे.

सनाने महाशिवरात्रीनिमित्त मार्गदर्शक सूचना दिल्या आहेत. त्या अनुषंगाने शहरातील नागरिकांनी अत्यंत साध्या पद्धतीने महाशिवरात्री साजरी करावी. घरूनच पूजाअर्चा करावी. सामाजिक अंतराचे भान ठेवावे. मंदिर व्यवस्थापनाने खबरदारी न घेतल्यास नियमाप्रमाणे कारवाई करण्यात येईल.

– दादासाहेब चाबुकस्वार, उपायुक्त प्रशासन

पनवेलमध्ये धार्मिक स्थळांवर र्निबध

पनवेल : शहरात करोना रुग्णांत वाढ होत असतानाही धार्मिक स्थळांवर गर्दी होत आहे. महाशिवरात्रीला होणाऱ्या संभाव्य गर्दीचा विचार करीत महापालिका प्रशासनाने धर्मादाय संस्थांना फौजदारी कारवाईचा इशारा दिला आहे. पालिका आयुक्त सुधाकर देशमुख यांनी तसे लेखी आदेशच काढले आहेत.

पालिका क्षेत्रातील सर्वच देवालयांना हे आदेश लागू असून कोणत्याही एका धर्माच्या मंदिरांसाठी हे आदेश नसल्याचे त्यांनी स्पष्ट केले. पनवेलमध्ये दिवसभरात दीडशेहून अधिक करोनाग्रस्त आढळत असल्याने धार्मिक स्थळांवरील गर्दी कमी करणे गरजेचे आहे.