नवी मुंबई: नवी मुंबई सारख्या शहरात गांजा विक्री करण्यास आलेल्या व्यक्तीला अटक करण्यात आले आहे. त्याच्या कडून दोन किलो १४२ ग्रॅम गांजा जप्त करण्यात आला असून हि कारवाई अंमली पदार्थ विरोधी पथकाने केली आहे. नशा मुक्त नवी मुंबई या अभियानातंर्गत नवी मुंबई पोलीस विभागाच्या अंमली पदार्थ विरोधी पथक सतर्क असते. अशाच सतर्कतेने गांजा विक्री करणाऱ्या इसमावर कारवाई करण्यात आली आहे. आणखी वाचा- नवी मुंबई: हुक्का पार्लरवर पोलिसांचा छापा भावेश मढवी असे अटक आरोपीचे नाव आहे. अंमली पदार्थ विरोधी पथकाला गांजा विक्री करण्यास एक इसम तळोजा पाचनंद, भोईर पाडा, मेट्रो कारशेडच्या मागे, पेठाली गांव, तालुका पनवेल जिल्हा येथे असल्याची माहिती मिळाली. याच परिसरात आरोपी राहत असल्याचेही समोर आले. ही माहिती मिळताच या ठिकाणी छापा टाकण्यात आला. त्यावेळी आरोपीही पोलिसांच्या हाती सापडला. त्याच्या कडून ०२ किलो १४२ ग्रॅम वजनाचा गांजा हा अंमली पदार्थ एकूण ४२ हजार ८४० रुपये किमतीचा मुद्देमाल जप्त करण्यात आला आहे. अशी माहिती अंमली पदार्थ विरोधी कक्षाचे वरिष्ठ पोलीस निरीक्षक बी.एस.सय्यद यांनी दिली.
