फळांच्या दरांत वाढ, आवक घटल्याचा परिणाम

फळांची आवक घटण्यामागे पावसाळ्यातील हवामानाचा फळबागांवर होणारा परिणाम, फळगळ, कीड-रोग तसेच हंगामानुसार उत्पादनातील बदल ही कारणे असू शकतात. पावसामुळे काही ठिकाणी काढणी आणि वाहतुकीवरही परिणाम होतो. मात्र, प्रत्येक फळाच्या आवकेत झालेल्या घटीमागे एकच कारण नसून उत्पादक भागानुसार परिस्थिती बदलत असल्याचे मत फळ व्यापाऱ्यांनी व्यक्त केले. घाऊक बाजारात दरवाढ झाल्याने किरकोळ बाजारातही दरवाढीची शक्यता व्यापाऱ्यांनी व्यक्त केली आहे.

दरम्यान, आवक घटली असली तरी सर्वच फळांचे दर वाढलेले नाहीत. डाळिंबाची आवक १,५८९ वरून ७९५ क्विंटलवर आली असली तरी त्याचा सरासरी दर १३५ रुपयांवरून १३० रुपये प्रतिकिलो झाला. अननसाची आवक ८०० वरून ३०० क्विंटल झाली; मात्र त्याचा सरासरी दर ५५ रुपये प्रतिकिलोवर स्थिर राहिला. यावरून केवळ आवक घटणे नव्हे, तर मागणी आणि उपलब्ध पुरवठ्याचाही दरांवर परिणाम होत असल्याचे व्यापाऱ्यांनी स्पष्ट केले.

सणासुदीत दर चढेच राहण्याची शक्यता

आगामी गणेशोत्सव आणि त्यानंतरचा नवरात्रोत्सव लक्षात घेता फळांना मागणी वाढण्याची शक्यता आहे. सध्या काही प्रमुख फळांची आवक घटलेली असताना सणासुदीच्या काळात मागणी वाढल्यास पुरवठ्यावर आणखी ताण येऊ शकतो. त्यामुळे संत्री, पेरू, मोसंबी यांसह काही फळांचे दर पुढील काळातही चढेच राहण्याची शक्यता फळ बाजारातील व्यापाऱ्यांनी व्यक्त केली आहे.

आवक आणि दरातील बदल
संत्रा नं. १ : १८ ऑगस्टला १९० क्विंटल आवक, सरासरी दर ७५ रुपये. २७ ऑगस्टला आवक २२ क्विंटल, तर दर ९० रुपये प्रतिकिलो.
पेरू नं. १ : १८ ऑगस्टला १,९२५ क्विंटल आवक, सरासरी दर ५५ रुपये. २७ ऑगस्टला आवक अवघी ४ क्विंटल, तर दर ६५ रुपये प्रतिकिलो.
मोसंबी नं. १ : १८ ऑगस्टला १,२२० क्विंटल आवक, सरासरी दर ४५ रुपये. २७ ऑगस्टला आवक ९८५ क्विंटल, तर दर ५५ रुपये प्रतिकिलो.

डाळिंब : १८ ऑगस्टला १,५८९ क्विंटल आवक, सरासरी दर १३५ रुपये. २७ ऑगस्टला आवक ७९५ क्विंटल, तर दर १३० रुपये प्रतिकिलो.
अननस नं. १ : १८ ऑगस्टला ८०० क्विंटल आवक, सरासरी दर ५५ रुपये. २७ ऑगस्टला आवक ३०० क्विंटल, तर दर ५५ रुपये प्रतिकिलो.