महापौर निवासातील वातानुकूलित यंत्रणेसाठी ४८ लाखांचा प्रस्ताव मंजूर

महापौर निवासातील विद्यमान वातानुकूलित व्यवस्था अनेक वर्षांपासून वापरात असून तिची कार्यक्षमता घटली आहे. परिणामी देखभाल खर्च वाढत असून अपेक्षित थंडावा मिळत नसल्याची बाब प्रशासनाने स्थायी समितीच्या निदर्शनास आणून दिली. या पार्श्वभूमीवर ऊर्जा कार्यक्षम आणि अद्ययावत तंत्रज्ञानावर आधारित नवीन वातानुकूलित यंत्रणा बसविण्याचा निर्णय घेण्यात आला आहे.

निविदा प्रक्रिया पूर्ण झाल्यानंतर लवकरच प्रत्यक्ष कामास सुरुवात होणार असून, नवीन यंत्रणेमुळे महापौर निवासातील सुविधा अधिक कार्यक्षम होणार असल्याचे प्रशासनाकडून सांगण्यात आले. परंतु, महापौर निवासात महापौर अद्याप राहायला गेल्या नसल्याने एवढा खर्च कोणासाठी असा सवाल विरोधकांकडून बैठकीत उपस्थित करण्यात आला.

विरोधकांचा आक्षेप

दरवर्षी देखभाल दुरुस्ती करूनही नवीन यंत्रणेची गरज काय असा सवाल स्थायी समिती सदस्या आणि शिवसेनेच्या नगरसेविका सरोज पाटील यांनी उपस्थित केला. यावर उत्तर देताना गेल्या सहा वर्षांत निवासाचा वापर नसल्यामुळे यंत्रणेची स्थिती अधिक बिघडल्याचे शहर अभियंता शिरीष आरदवाड यांनी स्पष्ट केले. तसेच ही यंत्रणा २० वर्षांपूर्वी बसविण्यात आल्याने कालानुरूप त्याची कार्यक्षमता घटल्याने नवीन यंत्रणा बसविण्याचा निर्णय घेण्यात आल्याचे आरदवाड यांनी सांगितले.