धूलिवंदनानिमित्त बेलापूर–पेणधर मेट्रो सेवा दुपारनंतर सुरू ; दर १५ मिनिटांनी धावणार गाड्या

मेट्रोच्या वेळेत बदल, प्रवाशांसाठी महत्त्वाची सूचना!

नवी मुंबई

March 1, 2026 20:47 IST

Navi Mumbai Metro Belapur Pendhar Service

नवी मुंबई: धूलिवंदनानिमित्त बेलापूर-पेणधर मेट्रो मार्गावरील सेवेत बदल; दुपारी २ नंतरच सुरू होणार सेवा.(छायाचित्र - लोकसत्ता टीम)

नवी मुंबई – धूलिवंदन सणानिमित्त मंगळवारी (ता. ३ मार्च) बेलापूर ते पेणधर या मेट्रो मार्गावरील मेट्रो सेवा सकाळच्या वेळेत बंद ठेवण्यात येणार आहे. सणाच्या पार्श्वभूमीवर प्रवाशांच्या सोयीसाठी दुपारी २ वाजल्यापासून रात्री १० वाजेपर्यंत मेट्रो सेवा सुरळीतपणे सुरू राहणार असून दर १५ मिनिटांनी मेट्रो उपलब्ध असेल.

सिडकोच्या मेट्रो मार्ग क्रमांक १ अंतर्गत येणाऱ्या बेलापूर–पेणधर या मार्गावर शेकडो प्रवासी दररोज प्रवास करतात. मात्र, धूलिवंदनाच्या दिवशी सकाळच्या सत्रात प्रवासी संख्या कमी असल्याने तसेच सणानिमित्त आवश्यक नियोजनासाठी सकाळची मेट्रो सेवा बंद ठेवण्याचा निर्णय सिडको प्रशासनाने घेतला आहे. त्यामुळे या दिवशी सकाळी प्रवास करणाऱ्या प्रवाशांनी पर्यायी वाहतुकीचा वापर करावा लागणार आहे.

दुपारी २ वाजल्यापासून मेट्रो सेवा पुन्हा सुरू झाल्यानंतर रात्री १० वाजेपर्यंत दर १५ मिनिटांनी मेट्रो गाड्या धावणार आहेत. यामुळे दुपारनंतर आणि सायंकाळच्या वेळेत प्रवास करणाऱ्या नागरिकांना कोणतीही अडचण येणार नाही, असा विश्वास सिडकोने व्यक्त केला आहे. या पार्श्वभूमीवर बेलापूर–पेणधर मेट्रो मार्गावरील सर्व प्रवाशांनी सदर बदलांची नोंद घ्यावी आणि त्यानुसार आपल्या प्रवासाचे नियोजन करावे, असे आवाहन सिडकोच्या जनसंपर्क विभागामार्फत करण्यात आले आहे.