Cricket stadium Navi Mumbai : नवी मुंबईत जागतिक दर्जाचे स्टेडियम, ॲड. आशिष शेलार यांची माहिती

नवी मुंबईत एक जागतिक दर्जाचे स्टेडियम उभारण्यासंदर्भात मंत्रालयात आढावा बैठक घेण्यात आली. या बैठकीस उरण विधानसभा मतदार संघाचे आमदार महेश बाल्दी व सिडकोचे अधिकारी उपस्थित होते.

नवी मुंबई विमानतळाजवळ सिडकोच्या वतीने विविध क्षेत्रासाठी राखीव अशा सिटी तयार केल्या जात आहेत. त्यात स्पोर्ट्स सिटीच्या प्रस्तावित क्षेत्रामध्ये स्टेडियम उभारणीचा पर्यायही विचाराधीन आहे. या स्पोटर्स सिटीसाठी ५० टक्के जमीन संपादित करण्यात आलेली आहे. विस्तीण अशा आंतरराष्ट्रीय स्पोटर्स सिटीसाठी लागणारी आवश्यक जमीन टप्प्याटप्प्याने संपादित करून प्रकल्पाला गती देण्याचे निर्देश अँड. शेलार यांनी दिले.

स्टेडियमसाठी सुमारे ४० एकर जागा आणि इतर पूरक सुविधांसाठी अतिरिक्त ३० एकर जागेची आवश्यकता लागणार आहे. या प्रकल्पासाठी आवश्यक आराखडा तयार करण्याबरोबरच प्रकल्प व्यवस्थापन सल्लागार नियुक्त करण्यात यावा. जागा निश्चित करणे आणि स्टेडियमचे नियोजन पूर्ण करण्यावर भर देण्यात यावा, अशा सूचना शेलार यांनी दिल्या. या प्रकल्पाचा सविस्तर आढावा घेण्यासाठी एप्रिल महिन्याच्या मध्यापर्यंत प्राथमिक अहवाल सादर केला जाणार आहे. प्रकल्पासाठी पुनरावलोकन बैठक पुढील महिन्यात घेतली जाणार आहे. स्टेडियम प्रकल्प वेळेत पूर्ण व्हावा यासाठी सर्व संबंधित विभागांनी समन्वयाने काम करण्याचेही निर्देश शेलार यांनी दिले.