एनआरआय कॉम्प्लेक्समधील तलावात गुलाबी पाणी

नवी मुंबई महापालिकेला या गुलाबी छटेची कल्पना नसल्याचे जनसंपर्क अधिकारी महेंद्र कोंडे यांनी सांगितले.

एनआरआय कॉम्प्लेक्समधील तलावातील पाणी गुलाबी झाले आहे. त्यामागच्या कारणांविषयी परिसरात तर्कवितर्क काढले जात आहेत. (छायाचित्र : नरेंद्र वास्कर)

प्रदूषणाच्या शंकेने परिसरातील रहिवाशांत तर्कवितर्काना उधाण

कमळांचे तलाव, रोहित पक्ष्यांचे वसतिस्थान, आकाशनिरीक्षणाचे ठिकाण, छायाचित्रणासाठी उत्तम जागा, एखादी डुबकी घेण्याची संधी, जॉगिंगचे ठिकाण.. एनआरआय कॉम्प्लेक्समधील तलाव आणि त्याचा परिसर अशा अनेक कारणांमुळे रहिवाशांना प्रिय आहे. मात्र सध्या हा तलाव चर्चेत आहे तो गुलाबी पाण्यामुळे. हे पाणी गुलाबी का झाले असावे, याविषयी अनेक ‘सिद्धांत’ सध्या या परिसरात मांडले जात आहेत.

वाशी पट्टय़ातील रासायनिक कंपन्यांचे सांडपाणी वाहून नेणाऱ्या वाहिनीला गळती लागल्यामुळे आणि ते सांडपाणी या तलावाच्या पाण्यात मिसळल्यामुळे हा रंगबदल झाला असावा, असे काही रहिवाशांचे म्हणणे आहे, तर बॉम्बे नॅचरल हिस्ट्री सोसायटीच्या जनसंपर्क अधिकारी बिल्वदा काळे यांच्या मते, हा रंगबदल विशिष्ट प्रकाराचे शैवाल वाढल्यामुळे झाला असण्याची शक्यता आहे, मात्र आवश्यक चाचणी केल्यानंतरच त्यामागचे नेमके कारण स्पष्ट होईल. नवी मुंबई महापालिकेला या गुलाबी छटेची कल्पना नसल्याचे जनसंपर्क अधिकारी महेंद्र कोंडे यांनी सांगितले.

काहींच्या मते, दर वर्षी उन्हाळ्यात येथील पाण्याची पातळी कमी होते. याच सुमारास रोहित पक्ष्यांचे थवे येथे मोठय़ा संख्येने उतरतात, त्यांच्या विष्ठेमुळे हा रंगबदल झाला आहे. पाण्याचा रंग का बदलला आहे, याचा शोध महापालिकेने घेणे आवश्यक आहे.

तलावालगत इमारती आणि शाळा आहेत. तेथील रहिवाशांच्या आरोग्याच्या दृष्टिकोनातून पालिकेने या समस्येकडे लक्ष द्यावे, अशी येथील रहिवाशांची मागणी आहे.

Loksatta Telegram लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

मराठीतील सर्व नवी मुंबई बातम्या वाचा. मराठी ताज्या बातम्या (Latest Marathi News) वाचण्यासाठी डाउनलोड करा लोकसत्ताचं Marathi News App. ताज्या बातम्या (latest News) फेसबुक , ट्विटरवरही वाचता येतील.

Web Title: Nri complex lake water

ताज्या बातम्या