पनवेलच्या कृषी बाजार समितीसमोरील रस्ता मोकळा

महापालिकेच्या सहाय्यक आयुक्त डॉ. रूपाली माने यांच्या मार्गदर्शनाखाली ही कारवाई करण्यात आली. माने यांच्याकडे प्रभाग समिती ‘ड’च्या प्रभाग अधिकारी पदाचीही सूत्रे सोपविण्यात आली आहेत. त्यांच्या मार्गदर्शनाखाली प्रभाग समितीचे अधीक्षक राजेश डोंगरे यांनी अतिक्रमण पथक, प्रभाग कार्यालयातील कर्मचारी, रायगड सुरक्षा रक्षक तसेच एमएसएफ सुरक्षा रक्षकांच्या पथकाच्या मदतीने कारवाई केली.

बाजार समितीसमोरील परिसरात सकाळच्या वेळेत मोठ्या प्रमाणावर हातगाड्या लावून व्यवसाय केला जात असल्याने ग्राहक आणि पादचाऱ्यांना रस्त्यावरून चालणेही मुश्कील होत होते. महापालिकेकडून या हातगाडी व्यावसायिकांवर नियमित कारवाई होत नसल्याने परिसरात ५० हून अधिक अवैध व्यवसाय करणाऱ्या हातगाडीवाल्यांची संख्या वाढली होती.

महापालिकेने केवळ एक दिवसाची कारवाई करून न थांबता दररोज पहाटेपासून सकाळच्या वेळेत या परिसरात कारवाई करावी, अशी मागणी नागरिकांकडून होत आहे. नियमित देखरेख आणि कारवाई झाल्यास बाजार समितीसमोरील रस्ता वाहतुकीसाठी मोकळा राहण्यास मदत होणार आहे.