तीन गुन्ह्यांनी पनवेल हादरले…

पनवेल शहर पोलीस ठाण्यात दाखल झालेल्या प्रकरणात एका २२ वर्षीय महिलेविरोधात भारतीय न्याय संहितेच्या कलम ९४ अन्वये गुन्हा नोंदविण्यात आला आहे. पोलिसांनी दिलेल्या माहितीनुसार, पनवेलमधील लाईन आळी परिसरातील एका खासगी दवाखान्याच्या शौचालयात सुमारे पाच ते सहा महिन्यांचे मृत अर्भक आढळून आले. संबंधित महिलेने अर्भकाचा जन्म लपविण्याच्या उद्देशाने गर्भपात करून त्याची विल्हेवाट लावण्याचा प्रयत्न केल्याचा आरोप आहे. अर्भक शौचालयातील फिनेलयुक्त पाण्याच्या बादलीत लपवून ठेवण्यात आल्याचे प्राथमिक तपासात समोर आले आहे. या प्रकरणी पोलिसांनी गुन्हा दाखल करून तपास सुरू केला आहे. पनवेल शहर पोलीस ठाण्याचे वरिष्ठ पोलीस निरीक्षक नितिन ठाकरे यांनी या प्रकरणातील महिलेचा शोध घेण्यासाठी विशेष पथक नेमले आहे.

दुसऱ्या घटनेत खारघर पोलीस ठाण्यात अज्ञात व्यक्तीविरोधात भारतीय न्याय संहिता आणि पोक्सो कायद्यान्वये गुन्हा दाखल करण्यात आला आहे. फिर्यादीच्या अल्पवयीन व शारीरिकदृष्ट्या विकलांग मुलीला अज्ञात व्यक्तीने फूस लावून तिच्यावर लैंगिक अत्याचार केल्याचा आरोप आहे. मुलीची वैद्यकीय तपासणी आणि सोनोग्राफी केल्यानंतर ती गर्भवती असल्याचे निदर्शनास आले. त्यानंतर कुटुंबीयांनी पोलिसांकडे तक्रार दाखल केली. या संवेदनशील प्रकरणाचा तपास सहाय्यक पोलीस आयुक्त विक्रम कदम यांच्या मार्गदर्शनाखाली वरिष्ठ पोलीस निरीक्षक संजय जोशी यांच्या नेतृत्वाखाली सुरू असून पोलिसांनी या प्रकरणातील संशयीताला अटक केल्याचे सांगीतले. मात्र हे प्रकरण संवेदनशील असल्याने या प्रकरणाची अधिक माहिती पोलिसांनी दिली नाही.

तसेच तीस-या घटनेत आकुर्ली येथील निवासी संकुलात सात वर्षांच्या मुलीशी गैरवर्तन केल्याप्रकरणी एका ४० वर्षीय व्यक्तीविरोधात खांदेश्वर पोलीस ठाण्यात पोक्सो कायद्यान्वये गुन्हा दाखल करण्यात आला आहे. या घटनेमुळे परिसरात चिंता व्यक्त होत असून आरोपी अद्याप फरार आहे. पोलिसांनी दिलेल्या माहितीनुसार, ३० मे रोजी सायंकाळी सहा वाजण्याच्या सुमारास आकुर्ली येथील एका संकुलात ही घटना घडली. पीडित मुलगी तिच्या मित्र-मैत्रिणींसोबत इमारतीखाली खेळत असताना संशय़ीत ४० वर्षीय आरोपी सुमेध घोक्षे याने तिला लपाछपी खेळण्याचे आमिष दाखवून इमारतीच्या जिन्याखाली नेले. तेथे त्याने मुलीला मांडीवर बसवून तिच्याशी गैरवर्तन केले तसेच अयोग्य कृत्य करण्यास सांगितल्याचा आरोप तक्रारीत करण्यात आला आहे.

घटनेनंतर मुलीच्या पालकांनी खांदेश्वर पोलीस ठाण्यात तक्रार दाखल केली. तक्रारीच्या आधारे भारतीय न्याय संहिता २०२३ चे कलम तसेच पोक्सो कायद्याच्या कलम अंतर्गत गुन्हा नोंदविण्यात आला. या प्रकरणातील आरोपीला कामाच्या ठिकाणावरून अटक केल्याची माहिती वरिष्ठ पोलीसन निरीक्षक ढाकणे यांनी दिली. संशयीताला न्यायालयाने दोन दिवासांची पोलीस कोठडी सूनावली आहे. अल्पवयीन मुलांशी संबंधित गुन्ह्यांबाबत नागरिकांनी सतर्क राहण्याचे आवाहन पोलिसांकडून करण्यात आले आहे.